އިދިކޮޅު މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) އިން ސަރުކާރާ ދެކޮޅަށް މާލޭގެ މަގުތަކުގައި ކުރިއަށްގެންދާ ސިލްސިލާ އިހުތިޖާޖުތަކުގެ ތެރެއިން، މިރޭ ބޭއްވުމަށް ހަމަޖެހިފައިވާ މުޒާހަރާގައި ކުރީގެ ރައީސް މުހައްމަދު ނަޝީދު ބައިވެރިވެވަޑައިގަންނަވާނެކަން އެމަނިކުފާނު ހާމަކުރައްވައިފިއެވެ.

އެމްޑީޕީގެ އާންމު މެންބަރުން ހިމެނޭ މީސްމީޑިއާ ގްރޫޕަކަށް ފޮނުއްވި މެސެޖެއްގައި ރައީސް ނަޝީދު ވަނީ، މިރޭގެ އިހުތިޖާޖުގައި އަމަލީ ގޮތުން ބައިވެރިވެވަޑައިގަންނަވާނެ ކަމުގެ ޔަގީންކަން ދެއްވާފައެވެ.

މިއީ އަލުން އެމްޑީޕީއާ ގުޅިވަޑައިގަތުމަށްފަހު، އެ ޕާޓީން ބާއްވާ އިހުތިޖާޖެއްގައި އެމަނިކުފާނު ފެނިވަޑައިގަންނަވާނެ ފުރަތަމަ ފަހަރެވެ. މީގެކުރިން އެމަނިކުފާނު ވަނީ ކައުންސިލް އިންތިހާބުގެ ކެމްޕޭން ނިންމުމަށް ބޭއްވި ރެލީގައި ވެސް ބައިވެރިވެވަޑައިގެންފައެވެ.

ސަރުކާރަށް 12 ޑިމާންޑެއް ހުށަހަޅައި، އެމްޑީޕީން މަގުމަތީގެ ހަރަކާތްތައް ފަށާފައިވަނީ މީގެ ދުވަސްކޮޅެއް ކުރިންނެވެ. އެ ޕާޓީން ބުނަމުންދަނީ، ދާދިފަހުން ބޭއްވުނު ލޯކަލް ކައުންސިލް އިންތިހާބާއި ފެންނަ ނުފެންނަ ވޯޓުގެ ނަތީޖާއިން ސަރުކާރަށް ރައްޔިތުންގެ އިތުބާރު ނެތްކަން ހާމަވެފައިވާ ކަމަށެވެ.

ސިޔާސީ މަސްރަހު ހޫނުވެފައިވާ މި ދަނޑިވަޅުގައި، ހުރިހާ ސިޔާސީ ޕާޓީތަކެއް އެކުލެވޭ އިންތިގާލީ ސަރުކާރެއް އެކުލަވާލުމަށް ރައީސް ނަޝީދު ވަނީ ގޮވާލައްވާފައެވެ. ނަމަވެސް، ރައީސް ޑރ. މުހައްމަދު މުއިއްޒު ވަނީ އިދިކޮޅާ އެކު އެފަދަ މަޝްވަރާއެއް ކުރަންޖެހޭ އެއްވެސް ސަބަބެއް އޮތް ކަމަށް ގަބޫލުނުކުރައްވާ ކަމަށް ވިދާޅުވެފައެވެ.