ރައީސް ޔާމީނަށްވެސް ވާދަކުރެވޭ ގޮތަށް އަވަސް އިންތިޚާބެއް ބޭއްވުމަށް އިދިކޮޅުން ސަރުކާރަށް ގޮވާލައިފި އެވެ.

އިދިކޮޅު ޕީޕީއެމުން "ލޯޔަލްޓީ ކާޑު" އިފްތިތާހު ކުރުމަށް ބޭއްވި ހަފްލާގައި ވާހަކަ ދައްކަވަމުން ޕީއެންސީގެ ރައީސް އަބްދުއްރަހީމް އަބްދުﷲ ވިދާޅުވީ ރާއްޖޭގައި މިއަދު ރައްޔިތުން އެދޭފަދަ ވެރިކަމެއް ކުރެވެމުންނުދާތީއާއި، މިނިވަންކަމާއި ސިދާތު ގެއްލިގެންދިއުމުގެ ބިރުބޮޑުވެފައިވާތީ އަވަސް އިންތިޚާބެއްގެ މުހިންމުކަން ނުހަނު ބޮޑުވެފައިވާ ކަމަށެވެ.

އަދުރޭ ވިދާޅުވީ، މިއަދު ރާއްޖޭގައި ވެރިކަން ކުރަމުންދަނީ ރައްޔިތުންގެ ވިންދާ އިހުސާސްތަކާއި ދިމާ އިދިކޮޅަށް ކަމަށާއި، ރައްޔިތުންނަށް ބޭނުންވާ އަސާސީ ޚިދުމަތްތަކާއި، ޒަރޫރީ ކަންކަން ފުއްދުމަށް ބޭނުންވާ ތަކެތިވެސް މިއަދު ޔަގީން ނުކުރެވި އެތައް ރައްޔިތުން މަގުމަތިވެފައިވާ ކަމަށެވެ. އަދި ރައީސް ޔާމީންގެ ވެރިކަން ނިމުނު ފަހުން ވެރިކަމާއި ހަވާލުވި ރައީސް އިބްރާހީމް މުޙައްމަދު ޞާލިޙް ވަނީ ވައުދުވެސް ނުފުއްދައި ރައްޔިތުންގެ އުންމީދުތައްވެސް ހާސިލްކޮށްދިނުމަށް ނުކުޅެދިފައި ކަމަށް އަދުރޭ ވިދާޅުވިއެވެ.

"މިއަދު ނެތް ގައުމަށް ހެޔޮއެދޭ އެއްވެސް ސިޔާސީ ލީޑަރެއް. މިޤައުމަށް ހެޔޮއެދިގެން، ރައްޔިތުންނަށް ހެޔޮއެދިގެން، ކަމެއްކޮށްދިނީ ރައީސް ޔާމީން. އަޅުގަނޑު ސަރުކާރަށް، ރައީސް ޞާލިހަށް ގޮވާލަން އަވަސް އިންތިހާބެއް ބާއްވައި ދިނުމަށް. ރައީސް ޔާމީންވެސް ބައިވެރިވެވޭގޮތަށް އަވަސް އިންތިޚާބަކަށް އަޅުގަނޑުމެން ގޮވާލަން." އަދުރޭ ވިދާޅުވިއެވެ.

މިއަދު ވެރިކަން ކުރައްވާ ފަރާތުން ޤާނޫނާއި ޚިލާފަށް ރައީސް ޔާމީން ޖަލުގައި ބާއްވައިގެން ދެމުންގެންދާ އަނިޔާތަކަށް އިންސާފު ޤާއިމްކުރެވޭނެ ދުވަހެއް އަންނާނެކަމަށް އަދުރޭ ވިދާޅުވިއެވެ. އަދި ރައީސް ޔާމީނަށް އަނިޔާ ދެނީ ސީދާ ރައީސް، އިބްރާހީމް މުޙައްމަދު ޞާލިހާއި ރައީސް ނަޝީދު އިސްވެ ތިއްބަވައިގެންކަމަށް އަބްދުއްރަހީމް ވިދާޅުވިއެވެ.