އަޅުގަނޑުމެންގެ ހަށިގަނޑުގެ އެތެރެހަށީގައި ހިނގާ ބައެއް ބަދަލުތަކާއި ކުރިމަތިވާ ސިއްހީ މައްސަލަތަކުގެ ނިޝާންތައް، ހަށިގަނޑުގެ ބޭރުފުށުން ނުވަތަ ހަންގަނޑުން ފެންނަން ހުރެއެވެ. މިގޮތުން ކަރުގެ ވަށައިގެން ކަޅުވުމާއި، ހަންގަނޑުގެ ކުލަ ތަފާތުވުމާއި (ޕިގްމެންޓޭޝަން)، އަދި މޫނުގައި ބިހި ނެގުމަކީ ގިނަ ފަހަރަށް ހަމައެކަނި ހަމުގެ މައްސަލައެއް ކަމަށް އަޅުގަނޑުމެންނަށް ހީވެފައި އޮވެއެވެ. ނަމަވެސް، މިއީ ތައިރޮއިޑް ގްލޭންޑް އޯވަރއެކްޓިވްވުން ނުވަތަ 'ހައިޕަރތައިރޮއިޑިޒަމް' ގެ ސަބަބުން ދިމާވާ ކަމަކަށް ވެދާނެ ކަމަށް ސިއްހީ ދިރާސާތަކުން ދައްކައެވެ.

ތައިރޮއިޑް ގްލޭންޑަކީ ހަށިގަނޑުގެ މެޓަބޮލިޒަމް ނުވަތަ ހަކަތަ އުފެއްދުމުގެ ނިޒާމު ކޮންޓްރޯލްކުރާ މައިގަނޑު ގުނަވަނެވެ. ތައިރޮއިޑް ހޯރމޯންތައް ހުންނަންޖެހޭ މިންވަރަށްވުރެ އިތުރުވުމުން (ހައިޕަރތައިރޮއިޑިޒަމް)، ހަށިގަނޑުގެ ހުރިހާ މަސައްކަތްތަކެއް ހަލުވިވެގެން ދެއެވެ. މި ބަދަލުގެ އަސަރު ހަންގަނޑަށް ވަރަށް ބޮޑަށް ކުރެއެވެ. ހަންގަނޑުގެ ސެލްތައް އުފެދުމާއި، ހަންގަނޑުން ތެޔޮ ބޭރުކުރުމުގެ ނިޒާމަށް ބަދަލު އައުމުގެ ސަބަބުން އާދަޔާ ހިލާފަށް އޮށާޅަ ނެގުމާއި ހަންގަނޑު ތެޔޮވުން ފަދަ ކަންކަން ދިމާވެއެވެ.

ކަރުގެ ވަށައިގެން ހަންގަނޑު ކަޅުވުން ނުވަތަ 'އެކަންތޯސިސް ނިގްރިކަންސް' އަކީ އާންމުކޮށް ހަކުރު ބައްޔާ ގުޅިފައިވާ ކަމެއް ކަމަށް ބެލެވުނު ނަމަވެސް، މިއީ ތައިރޮއިޑްގެ މައްސަލަ ހުންނަ މީހުންގެ ކިބައިން ވެސް ފެންނަ އަލާމާތެކެވެ. ތައިރޮއިޑް ހޯރމޯންގެ ނުތަނަވަސްކަމުގެ ސަބަބުން ހަށިގަނޑުގެ އިންސިއުލިން ރެސިސްޓެންސްއަށް ބަދަލު އައިސް، ކަރުގެ ފަހަތާއި ކަރުގެ ވަށައިގެން ހަންގަނޑު ބޯވެ، ކަޅުކުލަ ގަދަވެއެވެ. މީގެ އިތުރުން ހަށިގަނޑުގެ އެކި ތަންތަނުން ހަމުގެ ކުލަ ބަދަލުވެ، ލައްތައް ޖެހުމަކީ ވެސް ތައިރޮއިޑް ހޯރމޯން އިތުރުވުމުން ދިމާވާ ކަމެކެވެ.

ހައިޕަރތައިރޮއިޑިޒަމް ހުންނަ މީހުންގެ ހަންގަނޑުން ފެންނަ އެހެން ބައެއް އަލާމާތްތަކަށް ބަލާއިރު، ހަންގަނޑު އާދަޔާ ހިލާފަށް މަޑުވުމާއި، ހޫނުވުމާއި، އަދި ދާހިއްލުން އިތުރުވުން ހިމެނެއެވެ. ބައެއް މީހުންގެ ހަންގަނޑުގައި ދިލަ ނެގުމާއި، ހިރުވުން ފަދަ އުނދަގޫތައް ވެސް ކުރިމަތިވެއެވެ. އަދި ބިހި ނެގުމުގެ މައްސަލަތައް ތަފާތު ކްރީމްތަކާއި ބޭސްތައް ބޭނުންކޮށްގެން ވެސް ރަނގަޅުނުވާ ނަމަ، އެއީ ތައިރޮއިޑް ފަދަ ހޯރމޯންގެ މައްސަލައެއްތޯ ޔަގީންކުރުމަކީ މުހިންމު ކަމެކެވެ.

ވީމާ، ހަމުގެ މައްސަލަތަކަކީ ހަމައެކަނި ބޭރުފުށުން ފެންނަ ކަމެއް ކަމަށް ބަލައި އިހުމާލުވުމުގެ ބަދަލުގައި، އެއީ ހަށިގަނޑުގެ އެތެރޭގެ ބައްޔެއްގެ ނިޝާނެއްތޯ ބެލުން ބުއްދިވެރިއެވެ. ކަރު ކަޅުވުމާއި، މޫނުގައި ބިހިތައް ނެގުން ފަދަ މައްސަލަތައް ހުރި ނަމަ، ލޭގެ ޓެސްޓެއް ހަދައި ތައިރޮއިޑް ހޯރމޯން ހުރި މިންވަރު ޗެކްކުރުމަށް ޑޮކްޓަރެއްގެ ލަފާ ހޯދުމަކީ ދިގު މުއްދަތުގެ ސިއްހީ މައްސަލަތަކުން ސަލާމަތްވުމަށް އެޅޭ މުހިންމު ފިޔަވަޅެކެވެ.