ސްވިޑަންގެ އެންވަޔަރަންމަންޓް އެންޑް ކްލައިމެޓް މިނިސްޓަރު ރޮމީނާ ޕޫރްމޮޚްތާރީ، ޔޫރަޕިއަން ޔޫނިއަން (އީޔޫ) ގެ ބައްދަލުވުމަކަށް ތިން މަހުގެ ތުއްތު ދަރިފުޅު އާދަމް ގޮވައިގެން ވަޑައިގެން ތާރީޚީ ކަމެއް ކޮށްފިއެވެ.

ލަކްޒަމްބާގްގައި ބޭއްވި މި ބައްދަލުވުމަކީ އީޔޫގެ މިނިސްޓަރުންގެ ބައްދަލުވުމަކަށް ތުއްތު ކުއްޖަކު ހާޒިރުކުރި ފުރަތަމަ ފަހަރުކަމަށް އީޔޫގެ އޮފިޝަލުން މައުލޫމާތު ދެއެވެ.

30 އަހަރުގެ މިނިސްޓަރު ވިދާޅުވީ، އޭނާ މިފަދައިން އަމަލުކުރެއްވީ ވަޒީފާއާއި އާއިލީ ޒިންމާތަކާ ދެމެދު ގޮތެއް ނިންމަން ނުޖެހޭނެކަން ސާބިތުކޮށްދިނުމަށާއި، ދަރިން ބެލުމުގެ ޒިންމާ މައިންބަފައިން ހަމަހަމަކޮށް ހިއްސާކުރުމުގެ މުހިންމުކަން ދައްކައިދިނުމަށް ކަމަށެވެ.

މިނިސްޓަރު ރޮމީނާ އިތުރަށް ފާހަގަކުރެއްވި ގޮތުގައި، މިކަން ކާމިޔާބުވީ ސްވިޑަންގައި އޮތް އެންމެ ފުރިހަމަ ޕޭރަންޓަލް ލީވް ނުވަތަ ބެލެނިވެރިންނަށް ދޭ ޗުއްޓީގެ ނިޒާމުގެ ސަބަބުންނެވެ.

އޭނާގެ ފިރިކަލުން މިހާރު ޗުއްޓީގައި ހުންނަވައިގެން ދަރިފުޅު ބެލުމުގެ ޒިންމާ އުފުއްލަވަމުން ގެންދަވާއިރު، މި ފިޔަވަޅަކީ ދަރިން ބެލުމުގެ ޒިންމާ މައިންބަފައިން ހަމަހަމަކޮށް ހިއްސާކުރުމަށް ބާރުއަޅާ ކަމެއްކަމަށް އޭނާ ވިދާޅުވިއެވެ.

މި ބައްދަލުވުމުގައި ބައިވެރިވި އެހެން ގައުމުތަކުގެ މިނިސްޓަރުން ވެސް މިނިސްޓަރު ރޮމީނާގެ މި ނިންމުމަށް މަރުހަބާ ކިޔާފައިވާއިރު، މިކަމަކީ މަސައްކަތުގެ މާހައުލުގައި މައިންނަށް ދިމާވާ ގޮންޖެހުންތަކާމެދު ބައިނަލްއަގުވާމީ ފެންވަރުގައި މަޝްވަރާތަކެއް ފެށިގެން ދިއުމަށް ލިބުނު ފުރުސަތެއްކަމަށް ގިނަ ބަޔަކު ދެކެއެވެ.