ބުރުޖް ހަލީފާގެ 141 ވަނަ ފަންގިފިލާގައި ހުންނަ އޮފީހެއްގައި އިނދެ، އުމުރުން އެންމެ 14 އަހަރުގެ ޖައިނަމް ޖައިން އަންނަނީ ޓެކްނޮލޮޖީގެ ދުނިޔޭގައި ފާހަގަކޮށްލެވޭ ފަދަ ބޮޑެތި ބަދަލުތަކެއް ގެންނަމުންނެވެ.

އުމުރުގެ ގޮތުން ކިޔެވުމާއި ކުޅިވަރަށް ހުސްވާންވީ ދުވަސްވަރު، އޭނާ ފާހަގަކުރެވެނީ އާޓިފިޝަލް އިންޓެލިޖެންސް (އޭއައި) ގެ ދާއިރާއިން ފައިތިލަ ސާބިތުކޮށްފައިވާ ހުނަރުވެރި ވިޔަފާރިވެރިއެއްގެ ގޮތުގައެވެ. ޖައިނަމް އުފެއްދި "މެންގޯ އިންޖިން" އަކީ ކުދި ވިޔަފާރިތަކަށް އަމާޒުކޮށްގެން ފަރުމާކޮށްފައިވާ އޭއައި މާކެޓިން ޕްލެޓްފޯމެކެވެ.

މި ނިޒާމު މެދުވެރިކޮށް، ވިޔަފާރިތަކަށް ބޭނުންވާ 365 ދުވަހުގެ ކޮންޓެންޓާއި، ސްޓްރެޓެޖީތައް އަދި ކެމްޕޭންތައް މަދު މިނެޓުކޮޅެއްގެ ތެރޭގައި އޮޓޮމޭޓްކޮށްދެއެވެ. ވިޔަފާރިތަކުގެ މާކެޓިން މަސައްކަތްތައް ލަސްވެ، އެކަށީގެންވާ ނަތީޖާއެއް ނުނެރެވޭކަން ފާހަގަކުރެވިގެން ޖައިނަމް މި މަސައްކަތް ފެށީ، އުމުރުން ހަ އަހަރުގައި ބައްޕައާއެކު ވިޔަފާރި ބައްދަލުވުމަކަށް ދިޔަ ހިސާބުން އުފެދުނު ޝައުގުވެރިކަމެއްގެ ތެރެއިންނެވެ.

ޖައިނަމްގެ މި ކާމިޔާބީގެ ފެށުމަކީ ހަތް އަހަރުގައި އޭނާ ފެށި "ޖޭޖޭ ފަން ޓައިމް" ޔޫޓިއުބް ޗެނަލެވެ. އެ ޗެނަލް މެދުވެރިކޮށް ސައިންސްގެ އެކްސްޕެރިމަންޓްތައް ދައްކައި، ކުރު މުއްދަތެއްގެ ތެރޭގައި އޭނާ ވަނީ އެތައް ސަތޭކަ ހާސް ސަބްސްކްރައިބަރުން ހޯދާފައެވެ.

އޭގެ އިތުރުން، އަމިއްލައަށް ކަނޑައަޅާފައިވާ ގޮންޖެހުންތަކުން އޭނާ ވަނީ ވިޔަފާރީގެ ހުނަރުތައް ދަސްކޮށްފައެވެ. އެގޮތުން 50 ދުވަހުގެ ތެރޭގައި 50 ނެޓްވޯކިން އިވެންޓުގައި ބައިވެރިވުމާއި 50 ފޮތް ކިޔުމުގެ އިތުރުން، 2022 ވަނަ އަހަރު އިންޑިއާގައި ކުރިއަށް ގެންދިޔަ ދަތުރެއްގައި 50 ދުވަހުގެ ތެރޭގައި 120 މޯޓިވޭޝަނަލް އިވެންޓް ބާއްވައި 50،000 އަށްވުރެ ގިނަ މީހުންނާ ބައްދަލުކުރުމަކީ އޭނާގެ ލީޑަރޝިޕްގެ ގާބިލުކަން ދައްކުވައިދޭ ހެކިތަކެވެ.

ތައުލީމީ ގޮތުން ވެސް ޖައިނަމް ވަނީ ބޮޑެތި ކުރިއެރުންތަކެއް ހޯދާފައެވެ. އާންމު ސްކޫލް ނިޒާމުގެ ބަދަލުގައި ކޭމްބްރިޖް މަންހަޖު ހިޔާރުކޮށް، އުމުރުން 13 އަހަރުގައި އޭނާ ވަނީ އައިޖީސީއެސްއީ ގްރޭޑް 10 ގެ އިމްތިހާނު ފުރިހަމަކޮށްފައެވެ. މިއީ އާންމު އުމުރަށްވުރެ ތިން އަހަރު އަވަސް ކާމިޔާބީއެކެވެ.

މިހާރު ރަސްމީ ތައުލީމުން "ގޭޕް އިޔަރ" އެއް ނަގައިގެން މުޅިން ވިޔަފާރިއަށް ވަގުތު ހުސްކޮށްފައިވާއިރު، އޭއައި ގެ ރަސްމީ އެއްވެސް ކޯހެއް ނުހަދައި އަމިއްލައަށް ދިރާސާކޮށްގެން މި ދާއިރާއިން ކުރިއެރުން ހޯދުމަކީ ގިނަ ބައެއްގެ ސަމާލުކަން ހުއްޓުނު ކަމެކެވެ.

ޖައިނަމްގެ އަމާޒަކީ އޭއައި ޓެކްނޮލޮޖީއަކީ އިންސާނުންގެ މަސައްކަތްތައް ފަސޭހަކޮށްދީ، ގާބިލުކަން އިތުރުކޮށްދޭ ވަސީލަތަކަށް ހެދުމެވެ.

މިހާރު ބީޓާ މަރުހަލާގައި އޮތް އޭނާގެ ޕްލެޓްފޯމް ބޭނުންކުރުމަށް 100 އަށްވުރެ ގިނަ ވިޔަފާރިއަކުން ވެއިޓިން ލިސްޓުގައި ރަޖިސްޓްރީކޮށްފައިވާއިރު، ޒުވާނުންނަށް ވިޔަފާރީގެ ދާއިރާއަށް ނުކުތުމަށް ހިތްވަރު ދިނުމަކީ ވެސް އޭނާގެ ބޮޑު އަމާޒެކެވެ.