މާލޭގެ ކަރަންޓުގެ މައްސަލަ ޙައްލުވާނެ މަގެއް ކުރީގެ ރައީސް ޢަބްދުﷲ ޔާމީންގެ ސަރުކާރުގައި ދައްކާފައި ވާނެ ކަމަށް ރައީސް ޔާމީންގެ ސަރުކާރުގެ ހައުސިން މިނިސްޓަރ ޑރ. މުޢިއްޒު ވިދާޅުވެއްޖެއެވެ.

މާލޭގެ ބޮޑު ސަރަހައްދަކުން މިއަދު ހެނދުނު ކަރަންޓް ކެނޑުމާއި ގުޅިގެން ޑރ. މުޢިއްޒު ވިދާޅުވީ، ބްރިޖް ހުރަސްކޮށް މާލެއާއި ހުޅުމާލެ ޕަވާ ގްރިޑް ގުޅާލުމަށް މީގެ 3 އަހަރު ކުރިން ފައްޓަވާފައިވާ މަޝްރޫޢު އަވަހަށް ނިންމުމަކީ މާލޭގެ ކަރަންޓުގެ ޚިދުމަތަށް އޮތް ޙައްލު ކަމަށެވެ.

މީގެ އިތުރުން މުޢިއްޒުވަނީ، މާލޭ އިންޑަރސްޓްރިއަލް ވިލެޖުން ސްޓެލްކޯ އަށް 2018 ވަނަ އަހަރު ދީފައިވާ ބިމުގައި ޤާއިމްކުރަން ހަވާލުކުރި ޕަވަރ ހައުސް ގާއިމްކުރުމުންވެސް ކަރަންޓުގެ މައްސަލައަށް ޙައްލެއް ލިބިގެންދާނެ ކަމަށެވެ.

Bridge huraskoh Male aa Hulhumale power grid gulhaalumah meege 3 aharu kurin fattaafaivaa mashroou avahah nimmumaai, Male Industrial Village in STELCO ah 2018 gai dheefaivaa bimugai gaaimkuran havaalukuri powerhouse gaaimkurumakee Male ge current ge massalaige dhaaimee hallu.

— Dr Mohamed Muizzu (@MMuizzu) October 23, 2020

މާލެއިން ކަރަންޓުގެ ޚިދުމަތް ކެނޑުނީ މިއަދު ހެނދުނު 7:00 ހާއިރުން ފެށިގެންނެވެ. މާލެއިން ކަރަންޓު ކެނޑުމާއި ގުޅިގެން ސްޓެލްކޯއިން ބުނީ، ދިމާވި ޓެކްނިކަލް މައްސަލައަކާއި ގުޅިގެން މާލޭގެ ބޮޑު ސަރަހައްދަކުން ކަރަންޓު ކެނޑިފައިވާ ކަމަށާއި އެ މައްސަލަ ހައްލުކޮަށް ވީއެންމެ އަވަހަކަށް ކަރަންޓު ދިނުމުގެ މަސައްކަތް ކުރަމުންދާ ކަމަށެވެ. ނަމަވެސް ކަރަންޓު ކެނޑެން ދިމާވި ސަބަބު ސްޓެލްކޯއަކުން އަދި ހާމައެއް ނުކުރެއެވެ.

ގްރޭޓަރ މާލެ ސަރަހައްދުގައި ހިމެނޭ ހުޅުމާލެއާއި ވިލިމާލެއަކީ ކަރަންޓުގެ ޚިދުމަތް ވަކިން ދޭ ދެ ސަރަހައްދު ކަމަށްވާތީ ހުޅުމާލެއާއި ވިލިމާލޭގެ ކަރަންޓުގެ ޚިދުމަތަކަށް ބުރުލެއް ނާރައެވެ.