އޭ.ޑީ.އެޗް.ޑީ ނުވަތަ އެޓެންޝަން ޑެފިސިޓް ހައިޕަރއެކްޓިވިޓީ ޑިސްއޯޑަރ އަށް ފަރުވާ ހޯދުމަށް ބޭނުންކުރާ ބޭހުން ކުރާ އަސަރު، ދުވަސްތަކެއް ފަހުން ކުޑަވާހެން ހީވުމަކީ ފަރުވާ ހޯދާ ގިނަ ފަރާތްތަކަކަށް ދިމާވާ ކަމެކެވެ. މިކަން މިހެން ދިމާވަނީ ބޭހަށް ހަށިގަނޑު ހޭނުމުން ނުވަތަ "ޓޮލަރެންސް" އުފެދުމުން ކަމަށް ބައެއް ފަހަރު ބެލެވުނު ނަމަވެސް، މީގެ ފަހަތުގައި އެހެނިހެން ސިއްހީ އަދި ދިރިއުޅުމުގެ އާދަކާދަތަކާ ގުޅުންހުރި ސަބަބުތަކެއް ވެސް ހުރެދާނެއެވެ.

ބޭހުގެ ފައިދާ ކުޑަވާން މެދުވެރިވާ އެންމެ އާންމު އެއް ސަބަބަކީ އުމުރާއި ބަރުދަނަށް އަންނަ ބަދަލުތަކެވެ. ވަކިން ހާއްސަކޮށް ކުޑަކުދިން ބޮޑުވަމުން އަންނައިރު، އެކުދިންގެ މެޓަބޮލިޒަމަށް އަންނަ ބަދަލުތަކުގެ ސަބަބުން ކުރިން ދީފައި ހުންނަ ޑޯޒް މަދުވެ، އަލާމާތްތައް އަލުން ފެންނަން ފަށައެވެ. މީގެ އިތުރުން، އަންހެނުންގެ ހަށިގަނޑުގައި ހޯރމޯންތަކަށް އަންނަ ބަދަލުތަކުގެ ސަބަބުން، ހާއްސަކޮށް އެސްޓްރޯޖަން ލެވެލް ދަށްވާ ދުވަސްވަރު ބޭހުގެ ނަތީޖާ ދަށްވާކަން ފާހަގަކުރެވެއެވެ.

އޭ.ޑީ.އެޗް.ޑީގެ އަލާމާތްތައް އިތުރަށް ގޯސްވާން މެދުވެރިވާ އެހެނިހެން ސަބަބުތަކުގެ ތެރޭގައި ނަފްސާނީ ދުޅަހެޔޮކަން ހިމެނެއެވެ. ނިދި މަދުވުން، އާދަޔާ ހިލާފަށް ފިކުރުބޮޑުވުން، ނުވަތަ ޑިޕްރެޝަން ފަދަ ކަންކަމުގެ ސަބަބުން ބޭސް ބޭނުންކުރި ނަމަވެސް ސަމާލުކަން ދިނުމަށް އުނދަގޫވެ، ބޭހުން ކުރާ އަސަރު ކެނޑިފައިވާ ކަމުގެ އިހުސާސް ކުރެވިދާނެއެވެ. މިފަދަ ހާލަތްތަކުގައި ބޭހުގެ ނަތީޖާ ނުފެންނަނީ ބޭހުގެ މައްސަލައަކުން ނޫން ނަމަވެސް، ދިރިއުޅުމުގެ ބަދަލުތަކުގެ ސަބަބުންނެވެ.

ބޭހުން ކުރާ އަސަރު ކުޑަވާކަން ދެނެގަނެވޭނެ ބައެއް ނިޝާންތަކަކީ، ބޭސް ކާތާ މަދު ވަގުތުކޮޅެއްގެ ތެރޭގައި އަލާމާތްތައް އެނބުރި އައުމާއި، މަސައްކަތްތަކަށް ސަމާލުކަންދޭން ކުރިއަށްވުރެ ބޮޑަށް ދަތިވުމެވެ. އަދި ބޭސް ބޭނުންކުރާ ހާލަތުގައިވެސް މާބޮޑަށް ހަރަކާތްތެރިވެ، މަޑުން އިނުމަށް އުނދަގޫވާން ފަށައިފިނަމަ، އެއީ ފަރުވާއަށް ބަދަލެއް ގެންނަން ޖެހިފައިވާ ކަމުގެ އިޝާރާތެކެވެ.

މިފަދަ ހާލަތެއްގައި އަމިއްލައަށް ބޭސް ބޭނުންކުރުން ހުއްޓާލުމުގެ ބަދަލުގައި، އެންމެ ފުރަތަމަ ކުރަންޖެހޭ ކަމަކީ ޑޮކްޓަރާ މަޝްވަރާކުރުމެވެ. ޑޮކްޓަރު ބޭހުގެ ޑޯޒަށް ބަދަލު ގެނައުމަށް ނުވަތަ ބޭނުންކުރާ ބޭހުގެ ބާވަތް ބަދަލުކުރުމަށް (މިސާލަކަށް ސްޓިމިއުލަންޓުން ނޮން-ސްޓިމިއުލަންޓަށް) ލަފާދީފާނެއެވެ. މީގެ އިތުރުން، ބޭސް ބޭނުންކުރާ ވަގުތަށް ބަދަލު ގެނައުމަކީވެސް އަލާމާތްތައް ކޮންޓްރޯލް ކުރުމަށް އެހީތެރިވެދޭނެ ކަމެކެވެ.

ފަރުވާގެ ނަތީޖާ އެންމެ ފުރިހަމައަށް ހޯދުމަށްޓަކައި ބޭހުގެ އިތުރުން ދިރިއުޅުމުގެ އާދަކާދަތަކަށް ބަދަލު ގެނައުން މުހިންމެވެ. ގަވާއިދުން ކަސްރަތުކުރުމާއި، ސިއްހަތަށް ފައިދާހުރި ކާނާ ބޭނުންކުރުމާއި، އަދި ހަމަނިދި ހޯދުމަކީ ސިކުނޑީގެ މަސައްކަތްތައް ހަރުދަނާކޮށްދީ ބޭހުގެ އަސަރު އިތުރުކޮށްދޭނެ ކަންކަމެވެ. އެހެންކަމުން، ބޭހުން ކުރާ އަސަރު ކުޑަވާނަމަ، ޑޮކްޓަރުގެ އިރުޝާދާއެކު ލައިފްސްޓައިލް ބަދަލުކުރުމަކީ އޭ.ޑީ.އެޗް.ޑީ މެނޭޖްކުރުމަށް އޮތް އެންމެ ރަނގަޅު މަގެވެ.