އިންސާނިއްޔަތަށްޓަކައި އަމިއްލަ ފުރާނަ ނުރައްކަލަށް ހުށަހަޅައިގެން މަސައްކަތްކުރާ އެހީތެރިންނާއެކު ދިވެހިރާއްޖެ ސާބިތުކަމާއެކު އޮތްކަން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ހާމަކުރައްވައިފިއެވެ. ރައީސް މިކަން ހާމަކުރެއްވީ ދުނިޔޭގެ އިންސާނީ އިންސާނީ އެހީތެރިކަމުގެ ދުވަހާ (ވޯލްޑް ހިއުމެނިޓޭރިއަން ޑޭ) ގުޅިގެން ސޯޝަލް މީޑިއާ ޕްލެޓްފޯމް އެކްސްގައި ކުރެއްވި ޕޯސްޓެއްގައެވެ.

ރައީސުލްޖުމްހޫރިއްޔާގެ މެސެޖުގައި ވިދާޅުވީ، ދުނިޔޭގެ އެކި ކަންކޮޅުތަކުގައި އިންސާނީ އެހީތެރިކަމަށް ބޭނުންޖެހިފައިވާ މިންވަރު އިންތިހާއަށް އިތުރުވަމުންދާ މިދަނޑިވަޅުގައި، އާންމު ރައްޔިތުންނާއި އިންސާނީ އެހީ ފޯރުކޮށްދޭ ފަރާތްތައް ރައްކާތެރިކުރުމުގައި ދުނިޔެ ނުކުޅެދިފައިވާ މިންވަރު އެންމެ ބޮޑަށް ހާމަވެގެންދަނީ ފަލަސްޠީނުގެ ޣައްޒާއިން ކަމަށެވެ. އަދި ޣައްޒާއަށް އިންސާނީ އެހީ ވެއްދުމަށް ހުރަސްއެޅުމާއި، އެހީދޭ ފަރާތްތަކަށް އަމާޒުކޮށްދޭ އަނިޔާވެރި ހަމަލާތައް ދިވެހިރާއްޖެއިން އެންމެ ހަރުކަށި އިބާރާތުން ކުށްވެރިކުރާ ކަމަށްވެސް އެމަނިކުފާނު ވިދާޅުވިއެވެ. މީގެއިތުރުން، ޣައްޒާގައި ވަގުތުން ވަގުތަށް އަދި ދާއިމީކޮށް ހަނގުރާމަ ހުއްޓާލުމަށް ރާއްޖެއިން ތަކުރާރުކޮށް ގޮވާލާ ގޮވާލުން އެމަނިކުފާނު ވަނީ އައުކުރައްވާފައެވެ.

On #WorldHumanitarianDay, we stand in solidarity with humanitarian personnel around the world who risk their lives in the service of humanity.

At a time of growing humanitarian need, nowhere is the failure to protect civilians and aid workers more evident than in Gaza. The… pic.twitter.com/DkuRXh750F

— Dr Mohamed Muizzu (@MMuizzu) August 19, 2026

އެހެން މީހުންގެ ފުރާނަ ސަލާމަތްކުރުމަށްޓަކައި އިންސާނީ ޚިދުމަތުގައި ދެމިތިބި ހިތްވަރުގަދަ ފަރާތްތަކަށާއި، މި މަތިވެރި މަސައްކަތުގައި ފުރާނައިން ޤުރުބާންވި އެންމެހައި ފަރާތްތަކުގެ ޒިކުރާ އައުކުރައްވައި ރައީސް ވަނީ އެ ފަރާތްތަކަށް ޝަރަފާއި އިޙްތިރާމް އަދާކުރައްވާފައެވެ.

ރައީސް މުޢިއްޒު އިތުރަށް ފާހަގަކުރެއްވި ގޮތުގައި، އެހީތެރިން ދައްކުވައިދޭ މަތިވެރި ހިތްވަރަކީ ބައިނަލްއަޤްވާމީ އިންސާނީ ޙައްޤުތަކާބެހޭ ޤާނޫނުތައް ނެގެހެއްޓުމަށާއި، އިންސާނީ އެހީ ފޯރުކޮށްދޭ ހުރިހާ ފަރާތްތަކެއްގެ ރައްކާތެރިކަން ކަށަވަރުކުރުމަށްޓަކައި މުޅި ދުނިޔެ ގުޅިގެން އެކުގައި މަސައްކަތްކުރުމަށް ލާޒިމުކުރާ ކަމެކެވެ.