ރައީސް ޔާމީންގެ ސަރުކާރުން ތަރައްގީ ކޮށްފައިވާ ސުނާމީ ބިނާ މައިޒާން މި އަހަރު ފަސް ފަހަރަށް މަރާމާތުކޮށްފައިވާ ކަމަށް މާލެ ސިޓީ ކައުންސިލްގެ މޭޔަރު ޝިފާ މުޙައްމަދު ވިދާޅުވެއްޖެ އެވެ.

ލޮނުޒިޔާރަތް ކޮޅު ތޮށިގަނޑުން ބޭރުގައި ހަދާފައި ހުރި ސުނާމީ ބިނާ މީގެ ކުރިން ތިން ރުށް ޕާކް ގެ ގޮތުގައި މަޝްހޫރު ވެފައިވާ ސަރަޙައްދަށް، ބަދަލުކޮށް ޕާކެއް ގޮތުގައި އެތަން ތަރައްޤީ ކޮށްފައި ވަނީ ރައީސް ޔާމީންގެ ސަރުކާރުގައި މާލޭގެ މުހިއްމު ބިނާތައް އެއްތަނުން އަނެއް ތަނަށް ބަދަލުކޮށް ކުރިއަށް ގެންދިޔަ މަސައްކަތުގެ ދަށުންނެވެ.

Miaharu therey 5 faharu thiyathan maraamaikohfi . https://t.co/8rNgPQhEAg

— Shifa Mohammed🎈 (@SifaMohammed) October 31, 2020

ސުނާމީ ބިނާ މައިޒާން ވަރަށް ބޮޑަށް ވީރާނާ ވަމުންދާ މަންޒަރު ފެންނަ ވީޑިއޯއަކަށް ކުރެއްވި ކޮމެންޓެއްގައި މޭޔަރ ޝިފާ ވިދާޅުވީ ސުނާމީ ބިނާ މައިޒާން މި އަހަރު ފަސް ފަހަރަށް މަރާމާތުކޮށްފައިވާ ކަމަށެވެ. އަދި އެސަރުކާރު، މިސަރުކާރު ކިޔަމުން ކައުންސިލުން އެއްވެސް ކަމެއް ދޫކޮށް ނުލާނެ ކަމަށްވެސް ޝިފާ ވަނީ ވިދާޅުވެފައެވެ.

Councilun ehves kameh dhookosheh nulaane esarukaarey misarukaarey kiyaafa. @MaleCitymv . pic.twitter.com/QSw7gRYRCy

— Shifa Mohammed🎈 (@SifaMohammed) October 30, 2020

ސުނާމީ ބިނާ ވީރާނާވާން ދޫކޮށްލާފައިވާ ކަމަށް ވިދާޅުވެ ކުރީގެ ހައުސިން މިނިސްޓަރ މުހައްމަދު މުއިއްޒު ވެސް ވަނީ ސަރުކާރަށް ފާޑު ވިދާޅުވެފައެވެ. މުޢިއްޒު ވިދާޅުވީ، މި ސަރުކާރުން ވަނީ ރައްޔިތުން ބޭނުންކުރުމަށް ހަދާފައިވާ ތަންތަން ވީރާނާ ވުމަށް ދޫކޮށްލާފައި ކަމަށެވެ. އަދި އެގޮތަށް ޢަމަލު ކުރަނީ ރައްޔިތުންދެކެ ކޮން ރުޅިއެއް އަންނާތީތޯ ވިދާޅުވެ މުޢިއްޒު ވަނީ ސުވާލު އުފައްދަވާފައެވެ.

މާލޭ ހުޅަނގު ދެކުނު ފަރާތުގެ ތިން ރުއް ޕާކު ޒަމާނީ ފެންވަރަށް ތަރައްގިީކޮށް، ސުނާމީ ބިނާ މައިޒާންގެ ނަމުގައި އެ ތަން އަލުން ހުޅުވީ މާޗު 13، 2016، ގައެވެ. ރާއްޖެއަށް 2004 ވަނަ އަހަރު އެރި ސުނާމީގައި ގެއްލިދިޔަ މީހުންނާއި މަރުވި މީހުންގެ ޢަދަދު ރަމްޒުކޮށްދޭ ސުނާމީ ބިނާ މައިޒާން މިހާރު ވަނީ ވަރަށް ބޮޑަށް ވީރާނާ ވެފައެވެ.