ވެރިކަން ކުރާ ޕީޕަލްސް ނޭޝަނަލް ކޮންގްރެސް (ޕީއެންސީ) ގެ ކޮންގްރެސްގެ ސެޝަނެއްގައި ވާހަކަފުޅު ދައްކަވަމުން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވީ، ދިވެހިރާއްޖެ ތަރައްޤީ ކުރުމުގައި ދިވެހިންނާއި ސިޔާސީ ފަރާތްތަކުން ޤައުމު އިސްކުރަންޖެހޭ ކަމަށް ވިދާޅުވެއްޖެއެވެ.

އަދި ޤައުމު އިސްކުރާނަމަ، ސިޔާސީ ޕާޓީތަކުގެ އަމިއްލަ މަސްލަޙަތު އޮންނާނީ އެއަށްވުރެ ފަހަތުގައި ކަމަށް އެމަނިކުފާނު ފާހަގަކުރެއްވިއެވެ.

ރައީސް ވިދާޅުވި ގޮތުގައި، އެކި ސިޔާސީ ޕާޓީތަކުން ޤައުމު ތަރައްޤީ ކުރުމަށް ގެންގުޅޭ އެޕްރޯޗް ނުވަތަ ވިސްނުމުގައި ތަފާތުތަކެއް ހުރެދާނެއެވެ.

ނަމަވެސް އެއީ ސިޔާސީ ނިޒާމުގެ ތެރޭގައި މައްސަލައެއް ނޫން ކަމަށާއި، ކޮންމެ ޕާޓީއެއްގައި ހުރި ނަމަވެސް ޤައުމަށް ހެވާ ލާބަ ލިބޭ ކަންކަމަށް ތަރުޙީބުދީ އެއްބާރުލުން ދޭންޖެހޭނެ ކަމަށް ވިދާޅުވިއެވެ. މީގެއިތުރުން، ސަރުކާރުން ނުވަތަ ޕާޓީއަކުން ޤައުމަށް ގެއްލުންހުރި ކަމެއް ކުރާނަމަ، ވަގުތުން ތެދުވެ ޒިންމާދާރުކަމާއެކު އިދިކޮޅުން ވާހަކަދެއްކުމަކީ އިދިކޮޅު ސިޔާސީ ޙަރަކާތުގެ މުހިންމު ދައުރެއް ކަމަށް ރައީސް ފާހަގަކުރެއްވިއެވެ.

ޕީއެންސީގެ މުޅި ފަލްސަފާއަކީވެސް "އެންމެ ފުރަތަމަ ޤައުމު" އިސްކުރުމުގެ ފަލްސަފާ ކަމަށް ވިދާޅުވަމުން ރައީސް މުޢިއްޒު އެދިވަޑައިގެންނެވީ، ޤައުމީ ލޯބި އަދި ޤައުމީ ޖޯޝާއެކު އެންމެން ގުޅިގެން މަސައްކަތް ކުރުމަށެވެ. އެމަނިކުފާނު ވިދާޅުވި ގޮތުގައި، ޒުވާނުންނާއި، އިސްރަޙްވެހިންނާއި، އަންހެނުން އަދި ފިރިހެނުން ހިމެނޭހެން އެންމެހައި ރައްޔިތުންނަށް އޮތީ އެކަތިގަނޑެއްގެ ގޮތުގައި ޤައުމީ އެޖެންޑާއައިގެން ކުރިއަށް ދިއުމެވެ.

މީގެއިތުރުން، ސަރުކާރާ ހަވާލުވިއިރު ރާއްޖޭގެ އިޤްތިޞާދު އޮތީ ވަރަށް ބޮޑު އަނދަވަޅެއްގައި ކަމަށް އިޝާރާތް ކުރައްވައި، ރައީސް ވިދާޅުވީ އިޤްތިޞާދު ކޮޅަށް ޖެހުމުގެ މަސައްކަތް ކުރެވެމުންދަނީ ޚާއްޞަ ތަރުތީބެއްގެ ތެރެއިން ކަމަށެވެ.

އަދި ބައެއް ސިޔާސީ ބޭފުޅުން ޒިންމާދާރުކަން ކުޑަކޮށް ޤައުމަށް ގެއްލުންވާ ގޮތަށް މަސައްކަތް ކުރެއްވި ނަމަވެސް، އެފަދަ ގޮތްތައް ދޫކޮށްލައި އަންނަންއޮތް ޖީލުތަކަށްޓަކައި ޒިންމާދާރުކަމާއެކު މަސައްކަތް ކުރުމަށް ރައީސް ވަނީ އިލްތިމާސް ކުރައްވާފައެވެ.