ބަންގްލަދޭޝް މެދުވެރިކޮށް ދިވެހި ފުލުހުންނަށް ފަންނީ ތަމްރީނާއި ގާބިލުކަން އިތުރުކުރުމުގެ ފުރުސަތުތައް ފަހިކުރުމާ ގުޅޭގޮތުން މަޝްވަރާ ކޮށްފިއެވެ.

ފުލުހުން މިއަދު ބުނީ، މި މަޝްވަރާތައް ކުރިއަށްދިޔައީ ބަންގްލަދޭޝް ސަރުކާރުން ދިވެހިރާއްޖެއަށް ކަނޑައަޅުއްވާފައި ހުންނަވާ ހައިކޮމިޝަނަރ، ހިޒް އެކްސެލެންސީ ޑރ. އެމް.ޑީ. ނަޒްމުލް އިސްލާމް، ކޮމިޝަނަރ އޮފް ޕޮލިސް އަޙްމަދު މުޙައްމަދުގެ އަރިހަށް މިއަދު ކުރެއްވި އިހުތިރާމުގެ ޒިޔާރަތުގައި ކަމަށެވެ.

ދިވެހި ފުލުހުންގެ ޚިދުމަތުގެ މައި އިދާރާ، ޝަހީދު ޙުސައިން އާދަމް ބިލްޑިންގުގައި ބޭއްވި މި ބައްދަލުކުރެއްވުމުގައި، ދިވެހިރާއްޖެއާއި ބަންގްލަދޭޝްއާ ދެމެދު އޮތް ޒަމާންވީ ގާތް ގުޅުމާއި، ދެ ގައުމުގެ ދެމެދުގައި އޮތް އެއްބާރުލުން ފާހަގަކުރައްވައި ކޮމިޝަނަރ އޮފް ޕޮލިސް އަޙްމަދު މުޙައްމަދު ވަނީ ވާހަކަފުޅު ދައްކަވާފައެވެ.

މީގެއިތުރުން، ދެ ގައުމުގެ ފުލުހުންގެ މުއައްސަސާގެ ދެމެދުގައި އޮތް ގުޅުން އިތުރަށް ބަދަހިކޮށް ހަރުދަނާކުރުމާ ގުޅޭގޮތުން ދެބޭފުޅުން މަޝްވަރާ ކުރެއްވިއެވެ.

ހަމައެއާއެކު، ބަންގްލަދޭޝް މެދުވެރިކޮށް ދިވެހި ފުލުހުންގެ ފަންނީ ގާބިލުކަން ތަރައްގީ ކުރުމަށްޓަކައި ތަމްރީނުގެ އިތުރު ފުރުސަތުތައް ހޯދުމާ ގުޅޭގޮތުން ދެބޭފުޅުން ވަނީ ފުޅާ ދާއިރާއެއްގައި މަޝްވަރާ ކުރަށްވާފައި ކަމަށް ދިވެހި ފުލުހުންގެ ޚިދުމަތުން މަޤުލޫމާތު ދެއްވާފައިވެއެވެ.