އައްޑޫ ސިޓީގައި ދިމާވެފައިވާ ކަރަންޓުގެ މައްސަލަތަކަށް ދާއިމީ ހައްލެއް ހޯދައިދިނުމުގެ ގޮތުން، އެ ސިޓީގެ ކަރަންޓު ޚިދުމަތް ދިނުމުގެ މަސްއޫލިއްޔަތާ ސްޓޭޓް އިލެކްޓްރިކް ކޮމްޕެނީ (ސްޓެލްކޯ) އިން ރަސްމީކޮށް ހަވާލުވެއްޖެއެވެ.

މިއީ މާލެ ފިޔަވައި ރާއްޖޭގެ އެންމެ ބޮޑު އާބާދީއެއް ދިރިއުޅޭ އައްޑޫ ސިޓީގެ ކަރަންޓު ޚިދުމަތާ އެ ކުންފުނިން ހަވާލުވި ދެވަނަ ފަހަރެވެ.

މި ބަދަލާ ގުޅިގެން ސްޓެލްކޯގެ މެނޭޖިން ޑިރެކްޓަރު އަލީ އަޒުވަރު މިހާރު އައްޑޫ ސިޓީއަށް ކުރައްވަމުން ގެންދަވާ ދަތުރުފުޅުގައި ވަނީ އެ ސިޓީގެ މައި އިންޖީނުގެއަށާއި މަރަދޫފޭދޫ އޮފީހަށް ވަޑައިގެން، އެ ތަންތަނުގައި ރަސްމީކޮށް ސްޓެލްކޯގެ ދިދަ ނަންގަވައިދެއްވާފައެވެ. މި ބަދަލު އައުމާ ހަމައަށް އެ ސިޓީއަށް ކަރަންޓުގެ ޚިދުމަތް ފޯރުކޮށްދެމުން އައީ ފެނަކަ ކޯޕަރޭޝަނުންނެވެ.

މަރަދޫފޭދޫ އޮފީހުގެ މުވައްޒަފުންނާ ބައްދަލުކުރައްވައި ވާހަކަދައްކަވަމުން އެމްޑީ އަލީ އަޒުވަރު ވިދާޅުވީ، ސްޓެލްކޯއިން މި ޚިދުމަތާ ހަވާލުވުމަކީ އައްޑޫގެ ރައްޔިތުންނަށް ލިބިގެންދިޔަ އައު އުއްމީދެއް ކަމަށެވެ. އަދި ޒަމާނީ ވަސީލަތްތައް ބޭނުންކޮށްގެން، ރައްޔިތުން އިތުބާރުކުރާ ފެންވަރު ރަނގަޅު ދެމެހެއްޓެނިވި ޚިދުމަތެއް ފޯރުކޮށްދިނުމަށް ކުންފުނިން އެންމެ އިސްކަމެއް ދީގެން މަސައްކަތް ކުރާނެ ކަމުގެ ޔަގީންކަން ވެސް އޭނާ ދެއްވިއެވެ.

ކަރަންޓުގެ ޚިދުމަތަށް ގެނެވުނު މި ބަދަލުގެ އިތުރުން، އައްޑޫ ސިޓީގެ ފެނާއި ނަރުދަމާގެ ޚިދުމަތް ވެސް މާލެ ވޯޓާ އެންޑް ސެވަރޭޖް ކޮމްޕެނީ (އެމްޑަބްލިއުއެސްސީ) ގެ ދަށަށް ބަދަލުކުރުމަށް ވަނީ ނިންމާފައެވެ.

މިއީ ސަރުކާރުގެ ޚިދުމަތްތައް ހަރުދަނާކޮށް އެއް ފުރާޅެއްގެ ދަށަށް ގެނައުމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ގެންގުޅުއްވާ ސިޔާސަތުގެ ދަށުން ނިންމެވި ނިންމެވުމެކެވެ. އެގޮތުން، ފެނަކަ ކޯޕަރޭޝަން އުވާލައި، މުޅި ރާއްޖޭގެ ހުރިހާ ރަށެއްގެ ކަރަންޓުގެ ޚިދުމަތް ދިނުން ސްޓެލްކޯގެ ބެލުމުގެ ދަށަށް ބަދަލުކުރެއްވުމަށް ނިންމަވާފައިވާކަން ރައީސް ޑރ. މުއިއްޒު ވަނީ މީގެކުރިން އިއުލާނު ކުރައްވާފައެވެ.