ސައިކަލެއްގެ މަޑިދަށުގައި ފެންފުޅިއަކަށް އަޅައިގެން ބަނގުރާ (ބަނގުއާވި) ގެންގުޅުނު މީހަކު 10,600 ރުފިޔާއިން ޖޫރިމަނާކުރުމަށް އދ. އޮމަދޫ މެޖިސްޓްރޭޓް ކޯޓުން ޙުކުމްކޮށްފިއެވެ.

މި މައްސަލައިގައި ޙުކުމް އައިސްފައިވަނީ އދ. އޮމަދޫއަށް ނިސްބަތްވާ މީހެއްގެ މައްޗަށެވެ.

މި ހާދިސާ ހިނގާފައިވަނީ 2024 މާރިޗު 14 ވީ ދުވަހުގެ ހަވީރު 17:25 ހާއިރު، ޏ. ފުވައްމުލަކު މުޙައްމަދު ޖަމާލުއްދީން ނައިބު ތުއްތު މަގުގައި ހުންނަ އެމްޓީސީސީ ސައިޓާ ދިމާލުންނެވެ. ފުލުހުން އެ ސަރަޙައްދުގައި ޓްރެފިކް ބަލަހައްޓަމުން ދަނިކޮށް، އޭނާ ދުއްވި ސައިކަލު ހުއްޓުވައި ބަލައިފާސްކުރިއިރު މަޑިދަށުން ވަނީ 500 އެމްއެލްގެ ލައިފް ފެންފުޅިއެއް ފެނިފައެވެ. އެ ފުޅީގައި ހުރި ދިޔާތަކެތި ތަހުލީލުކުރުމުން ވަނީ ބަނގުއާތްވަށް ޕޮޒިޓިވްވެފައެވެ.

މި މައްސަލައާ ގުޅިގެން ދައުލަތުން އޭނާގެ މައްޗަށް އުފުލީ ދިވެހިރާއްޖޭގެ ޤާނޫނުލްއުޤޫބާތުގެ 613 ވަނަ މާއްދާގެ (ށ) އާ ޙަވާލާދީ، އެ މާއްދާގެ (ނ) ގެ 4 ވަނަ ނަންބަރުގެ ދަށުން "ހުއްދަނަގައިގެން ކުރަންޖެހޭ ކަމެއް ހުއްދަ ނުނަގާ ކުރުމުގެ" ކުށުގެ ދަޢުވާއެވެ.

މި މައްސަލައިގެ ޝަރީޢަތުގެ އިބްތިދާޢީ މަރުޙަލާގައާއި އަވަސްނިޔާގެ އަޑުއެހުމުގައި ވެސް ދަޢުވާ ލިބުނު ފަރާތުން ވަނީ ކުށަށް އިޢުތިރާފުވެފައެވެ. އޭނާ ކުށަށް އިޢުތިރާފުވުމާ ގުޅިގެން ޤާނޫނުލްއުޤޫބާތުގެ ދަށުން އަދަބުގެ ދަރަޖަ އެއްދަރަޖަ ލުއިކޮށް، ބަންދުގައި ހޭދަކުރި އެއް ދުވަސް އުނިކުރުމުން އޭނާގެ މައްޗަށް އައީ 1 މަހާއި 23 ދުވަހުގެ ޖަލު އަދަބެކެވެ.

ނަމަވެސް، އޭނާއަކީ ވަޒީފާއެއް އަދާކުރަމުންދާ މީހަކަށް ވުމާއި، މިއީ ޖިނާއީ ބޮޑު ކުށަކަށް ނުވާތީ، ޖަލު އަދަބުގެ ބަދަލުގައި އެހެން އަދަބެއް ކަނޑައެޅުމުގެ މަސްލަޙަތު ބޮޑުކަމަށް ބައްލަވައި މައްސަލަ ބެއްލެވި މެޖިސްޓްރޭޓް ވަނީ ޖަލު އަދަބު ޖޫރިމަނާއަށް ބަދަލުކުރައްވާފައެވެ.

އެހެންކަމުން، ކޯޓުން ވަނީ 10,600 ރުފިޔާގެ ޖޫރިމަނާގެ ފައިސާ ކުރިއަށް އޮތް ނޮވެމްބަރު މަހުގެ ނިޔަލަށް މޯލްޑިވްސް އިންލަންޑް ރެވެނިއު އޮތޯރިޓީ (މީރާ) އަށް ދައްކައި ޚަލާޞްކުރުމަށް އޭނާގެ މައްޗަށް އަމުރުކޮށްފައެވެ.