ހދ. ކުރިނބީ ބަނދަރު ޑިޒައިން ކުރުމާއި ހެދުމުގެ މަޝްރޫޢުގެ 55 އިންސައްތަ މަސައްކަތް ނިމި، މިހާރު ޕޭވްމަންޓް އެޅުމަށްޓަކައި ކުރަންޖެހޭ ކޮންކްރީޓް މަސައްކަތްތައް ބާރަށް ކުރިއަށްދާ ކަމަށް އެ މަސައްކަތް ކުރަމުން އަންނަ މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) އިން ހާމަކޮށްފިއެވެ.

މިނިސްޓްރީ އޮފް ހައުސިންގ، ލޭންޑް އެންޑް އާބަން ޑިވެލޮޕްމަންޓްގެ ފަރާތުން އެމްޓީސީސީއާ ޙަވާލުކޮށްގެން ކުރިއަށްގެންދާ މި މަޝްރޫޢަކީ ކުރިނބީގެ ރައްޔިތުންނަށް ދިމާވެފައިވާ ލަފާފުރުމުގެ ދަތިތަކަށް ދާއިމީ ހައްލެއް ހޯދައިދިނުމުގެ މަޤްޞަދުގައި ސަރުކާރުން ފަށާފައިވާ މުހިންމު މަޝްރޫޢެކެވެ. މި މަޝްރޫޢަކީ 2020 ވަނަ އަހަރު އިޢުލާނުކޮށް، 14 ސެޕްޓެމްބަރ 2021 ގައި އެމްޓީސީސީއާ ޢަމަލީ މަސައްކަތް ޙަވާލުކޮށްފައިވާ މަޝްރޫޢެކެވެ.

ކުރިނބީގެ ހުޅަނގު ދެކުނު ފަރާތުގައި ކުރިއަށްދާ މި މަޝްރޫޢުގެ ދަށުން 41،492 ކިއުބިކް މީޓަރުގެ ސަރަޙައްދެއްގެ ބަނދަރު ފުންކުރުމާއި، ގޮނޑުދޮށް ހިމާޔަތްކުރުމަށްޓަކައި 365 މީޓަރުގެ ބޮޑުހިލައިގެ ބޭރުތޮށްޓާއި ރިވެޓްމަންޓް ޖެހުމުގެ މަސައްކަތް ހިމެނެއެވެ. މީގެއިތުރުން ޕްރީކާސްޓް އެލް-ބްލޮކް ބޭނުންކޮށްގެން 340 މީޓަރުގެ އެއްގަމުތޮށި ލުމާއި، 1،677.61 އަކަމީޓަރުގެ ސަރަޙައްދެއްގައި ޕޭވްމަންޓް ހެދުމުގެ އިތުރުން ބަނދަރު ބައްތި ހަރުކުރުމުގެ މަސައްކަތް ވެސް މި މަޝްރޫޢުގެ ތެރޭގައި ހިމެނިގެން ކުރިއަށްދެއެވެ.

އެމްޓީސީސީން މަޢުލޫމާތު ދޭ ގޮތުގައި، މިހާރު ކުރިއަށްދާ ޕޭވްމަންޓް ކޮންކްރީޓް މަސައްކަތްތަކާއެކު މުޅި މަޝްރޫޢުގެ މަސައްކަތް ތާވަލާ އެއްގޮތަށް ބާރު ސްޕީޑުގައި ނިންމުމަށް ދަނީ މަސައްކަތް ކުރަމުންނެވެ.

މި ބަނދަރުގެ މަސައްކަތް އެއްކޮށް ނިމުމުން، ކުރިނބީގެ ރައްޔިތުން ލަފާފުރުމުގައި ތަޙައްމަލު ކުރަމުންދާ ދަތިތަކަށް ނިމުމެއް އައިސް، ރަށުގެ އިޤްތިޞާދީ އަދި އިޖުތިމާޢީ ކަންކަމަށް ބޮޑު ކުރިއެރުމެއް ލިބިގެންދާނެއެވެ.