ސަރުކާރުން އެޅި ހަރުދަނާ ފިޔަވަޅުތަކުގެ ސަބަބުން ކަޅު ބާޒާރުގައި ޑޮލަރުގެ އަގު ވަރަށް ބޮޑަށް ތިރިވެފައިވާ ކަމަށް ދިވެހިރާއްޖެއިން ޖަޕާނަށް ކަނޑައަޅުއްވާފައި ހުންނަވާ ސަފީރު އަހުމަދު މަހުލޫފް ވިދާޅުވެއްޖެއެވެ.

މެންދުރު ޓީވީގެ "ޓީ ޓޯކް" ޕްރޮގްރާމްގައި ވާހަކަދައްކަވަމުން މަހުލޫފް ވިދާޅުވީ، ޑޮލަރުގެ ވިޔަފާރިކުރާ ބައެއް ފަރާތްތަކުން ނޫސްތަކަށް ފައިސާދީގެން ޑޮލަރުގެ އަގު ގަސްދުގައި މަތިކުރުމަށް މަސައްކަތްކޮށްފައިވާ ކަމަށެވެ.

އެގޮތުން، ވަކި އަގުތަކެއްގައި ޑޮލަރު ވިއްކާ ކަމަށް ބުނެ ނޫސްތަކުގައި ޚަބަރު ފެތުރުމަކީ މާކެޓް އޮޅުވާލުމުގެ ގޮތުން ހިންގާފައިވާ ކަމެއްކަން އޭނާ ފާހަގަކުރެއްވިއެވެ.

ނަމަވެސް، ރައީސުލްޖުމްހޫރިއްޔާ މުހައްމަދު މުއިއްޒު އެޅުއްވި ފިޔަވަޅުތަކާއެކު މިހާރު ޑޮލަރުގެ އަގު ބޮޑުތަނުން ވެއްޓިފައިވާކަން ފާހަގަކުރައްވައި، މަހުލޫފް ވަނީ ސަރުކާރުން އިޤްތިޞާދީ ސިޔާސަތުތަކަށް ގެންނަވާ މިފަދަ ހެޔޮ ބަދަލުތަކަށް އެއްބާރުލުން ދިނުމަށް ރައްޔިތުންގެ ކިބައިން އެދިވަޑައިގެންފައެވެ.