ނިމިދިޔަ ސެޕްޓެންބަރު މަހުގެ ތެރޭގައި 900 އަށްވުރެ ގިނަ މައްސަލަ ދިވެހި ފުލުހުންގެ ޚިދުމަތަށް ރިޕޯޓްކޮށްފައިވާ ކަމަށާއި، އޭގެ ތެރޭގައި އެންމެ ގިނައީ ވައްކަމާއި މަގުމަތީގެ އެކްސިޑެންޓުތަކުގެ މައްސަލަތައް ކަމަށް ފުލުހުންގެ ތަފާސްހިސާބުތަކުން ހާމަވެއްޖެއެވެ.

ފުލުހުން އާންމުކޮށްފައިވާ އެންމެ ފަހުގެ ހިސާބުތައް ދައްކާގޮތުން، ނިމުނު މަހު ޖުމްލަ 924 މައްސަލައެއް ތަހުގީގު ކުރުމަށް ވަނީ ހުށަހަޅާފައެވެ. މި މައްސަލަތަކުގެ ތެރެއިން އެންމެ ބޮޑު އިންސައްތައެއް ހިއްސާކުރާ ވައްކަމުގެ 277 މައްސަލައެއް ރިޕޯޓްކޮށްފައިވާއިރު، ދެވަނައަށް އެންމެ ގިނައިން ހުށަހެޅިފައިވަނީ މަގުމަތީގެ އެކްސިޑެންޓުތަކުގެ 222 މައްސަލައެވެ.

މީގެއިތުރުން، މަސްތުވާތަކެތީގެ 165 މައްސަލައަކާއި، މުދާ ގެއްލިގެން ހުށަހެޅި 69 މައްސަލައިގެ އިތުރުން ތަކެއްޗަށް ގެއްލުން ދިނުމުގެ 57 މައްސަލައެއް ސެޕްޓެންބަރު މަހު ވަނީ ފުލުހަށް ރިޕޯޓްކޮށްފައެވެ. އަދި މާރާމާރީގެ 49 މައްސަލައާއި، ޚިޔާނާތްތެރިވުމުގެ 30 މައްސަލައާއި، ގެވެށި އަނިޔާގެ 23 މައްސަލައިގެ އިތުރުން ޖިންސީ ކުށްތަކުގެ 14 މައްސަލައަކާއި، މަކަރާއި ހީލަތް ހެދުމުގެ 9 މައްސަލަ އަދި ފޭރުމުގެ 9 މައްސަލައެއް ވެސް ވަނީ ހުށަހަޅާފައެވެ.

މިއަހަރުގެ ތަފާސްހިސާބުތަކަށް ބަލާއިރު، އަހަރުގެ ފުރަތަމަ ހަތަރު މަސްދުވަހު މަހެއްގެ މައްޗަށް އެވްރެޖުކޮށް 1،000 އަށްވުރެ ގިނަ މައްސަލަ ފުލުހުންނަށް ރިޕޯޓްކުރެވުނެވެ. ނަމަވެސް، އަހަރުގެ މެދުތެރެއިން ފެށިގެން އާންމު ކުށްތަކުގެ އަދަދު ވަކި މިންވަރަކަށް ވަނީ ކޮންޓްރޯލް ކުރެވިފައެވެ. މިއަހަރުގެ މިހާތަނަށް މުޅި ޖުމްލަ 9،454 މައްސަލަ ފުލުހަށް ހުށަހެޅިފައިވާއިރު، މުޅި އަހަރުގެ ރެކޯޑުތަކުންވެސް އެންމެ ކުރީގައި އުޅެނީ ވައްކަމުގެ 2،610 މައްސަލައާއި، 2،273 އެކްސިޑެންޓް މައްސަލައެވެ.

ފާއިތުވި އަހަރުގެ ސެޕްޓެންބަރު މަހު ހުށަހެޅުނު 1،142 މައްސަލައާ އަޅާބަލާއިރު، މިއަހަރުގެ ސެޕްޓެންބަރު މަހު ވައްކަމާއި މަސްތުވާތަކެތީގެ މައްސަލަތައް ވަނީ ނިސްބަތުން ދަށްކުރެވިފައެވެ. މަގުމަތީގެ ރައްކާތެރިކަން ކަށަވަރުކުރުމަށާއި، ވައްކަމާއި މަސްތުވާތަކެތީގެ މައްސަލަތައް މަދުކުރުމަށްޓަކައި ފުލުހުން މިހާރުވެސް ދަނީ ހާއްސަ ފިޔަވަޅުތަކެއް އަޅަމުންނެވެ.