ޅ. ނައިފަރު ޕޮލިސް ސްޓޭޝަންގެ ބެލުމުގެ ދަށުގައި ހުރި ގިނަ އަދަދެއްގެ ބަނގުރަލާއި ބިޔަރު، ކަނޑައެޅިފައިވާ އުސޫލުތަކާ އެއްގޮތްވާ ގޮތުގެ މަތިން ނައްތާލައިފިއެވެ.

މި ތަކެތި ނައްތާލާފައިވަނީ ސެޕްޓެމްބަރު މަހުގެ 28 ވަނަ ދުވަހުއެވެ. ފުލުހުން މަޢުލޫމާތު ދިން ގޮތުގައި، މި އޮޕަރޭޝަނުގައި ނައްތާލާފައިވަނީ 64 ފުޅި ބަނގުރަލާއި 16 ދަޅު ބިޔަރެވެ.

މި ތަކެއްޗަކީ 2025 ޑިސެމްބަރު 21 އިން ފެށިގެން 2026 ސެޕްޓެމްބަރު 28 ގެ ނިޔަލަށް ޅ. މަޑިވަރު އެއާޕޯޓުން ފުރަން ދިޔަ ފަތުރުވެރިންގެ އަތުން އެމްއެންޑީއެފުން ހިފެހެއްޓުމަށްފަހު، ފުލުހުންނާ ހަވާލުކޮށްފައިވާ ތަކެއްޗެވެ.

މި ތަކެތި ނައްތާލުމުގެ މަސައްކަތް ކުރިއަށް ގެންގޮސްފައިވަނީ ފުލުހުންގެ ބެލުމުގެ ދަށަށް ގެނެވޭ ބަނގުރަލާއި، ބަނގުރަލުގެ މައްސަލަތަކާ ގުޅިގެން ހިފެހެއްޓޭ ތަކެތި ނައްތާލުމުގައި ޢަމަލުކުރާނެ ގޮތުގެ ޤަވާއިދުގެ ދަށުން އެކަމަށްޓަކައި ޚާއްޞަކޮށް އެކުލަވައިލާފައިވާ ކޮމިޓީގެ ސީދާ ބެލުމުގެ ދަށުންނެވެ.

ރާއްޖޭގެ ޤާނޫނުތަކާއި އިސްލާމީ އުސޫލުތައް ދެމެހެއްޓުމުގެ ގޮތުން، މީހުން ދިރިއުޅޭ ރަށްރަށަށް މިފަދަ ތަކެތި އެތެރެވިޔަނުދީ ހުއްޓުވުމަށް ސަލާމަތީ ބާރުތަކުން އަންނަނީ ޚާއްޞަ ސަމާލުކަމެއް ދީގެން ފިޔަވަޅުތައް އަޅަމުންނެވެ.