ތ. ތިމަރަފުށީ ބަނދަރު އަޕްގްރޭޑް ކުރުމުގެ މަޝްރޫޢުގެ ދަށުން، އެއްގަމު ތޮށިލުމަށް ބޭނުންވާ ބްލޮކްތަކުގެ ފުރަތަމަ ޝިޕްމަންޓް އެރަށަށް ގެންގޮސް، ބަނދަރު ފުންކުރުމުގެ އަމަލީ މަސައްކަތް ބާރަށް ކުރިއަށްދާ ކަމަށް އެމްޓީސީސީން ހާމަކޮށްފިއެވެ.

މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) އިން ބުނީ، ޑިޒައިން އެންޑް ބިލްޑް އުސޫލުން ކުރިއަށްގެންދާ މި މަޝްރޫޢުގެ ދަށުން މިހާރު ކުރިއަށްދަނީ ބަނދަރު ފުންކުރުމުގެ މަސައްކަތްތަކާއި އެއްގަމު ތޮށިލުމުގެ މަސައްކަތަށް ވާންޖެހޭ އެންމެހައި ތައްޔާރީތައް ކަމަށެވެ.

ތިމަރަފުށީ ބަނދަރު ތަރައްޤީ ކުރުމުގެ މަޝްރޫޢު އެމްޓީސީސީއާ ހަވާލުކޮށްފައިވަނީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ތ. އަތޮޅަށް ކުރެއްވި ދަތުރުފުޅުގެ ތެރެއިން އެރަށުގައި ބޭއްވި ޚާއްޞަ ރަސްމިއްޔާތެއްގައެވެ. މި މަޝްރޫޢަކީ 113.56 މިލިއަން ރުފިޔާއަށް، 540 ދުވަހުގެ ތެރޭގައި ނިންމުމަށް އެ ކުންފުންޏާ ހަވާލުކޮށްފައިވާ މަޝްރޫޢެކެވެ.

މި މަޝްރޫޢުގެ ދަށުން 71,902 ކިއުބިކް މީޓަރުގެ ސަރަޙައްދެއްގެ ބަނދަރު ފުންކުރުމާއި، 644 މީޓަރުގެ އެއްގަމުތޮށި ލުމުގެ އިތުރުން 203.50 މީޓަރުގެ ބޭރުތޮށްޓެއް ލުމަށް ވަނީ ހަމަޖެހިފައެވެ. އަދި 543 މީޓަރުގެ ސަރަޙައްދެއްގައި ރިވެޓްމެންޓް ޖެހުމާއި، 92 މީޓަރުގެ ގްރޮއިން ޖެހުމުގެ އިތުރުން 3،200 އަކަމީޓަރުގެ ސަރަޙައްދެއްގައި ޕޭވްމަންޓް ހަދައި، 40 މީޓަރު ދިގު އަދި 6 މީޓަރު ފުޅާ ބްރިޖެއް އެޅުމާއި، ބަނދަރު ބައްތި ހަރުކުރުމުގެ މަސައްކަތް ވެސް މި މަޝްރޫޢުގެ ތެރޭގައި ހިމެނެއެވެ.

އާބާދީގައި ގާތްގަނޑަކަށް 3،000 އެއްހާ މީހުން ދިރިއުޅޭ ތިމަރަފުށްޓަކީ ވިޔަފާރިވެރިން ގިނަ، އަދި ފުޅާދާއިރާއެއްގައި ލޯކަލް ޓޫރިޒަމް ކުރިއަރަމުން އަންނަ ރަށަކަށް ވުމާއެކު، މި ބަނދަރުގެ މަސައްކަތް ނިމިގެން ދިއުމުން އެރަށުގެ އިޤްތިޞާދީ ހަރަކާތްތަކަށާއި، ލަފާފުރުމުގައި ރައްޔިތުންނަށް ދިމާވެފައިވާ ދަތިތަކަށް ބޮޑު ލުޔެއް ލިބިގެންދާނެއެވެ.