ހުޅުމާލޭގެ މަގުތަކުގައި ހިނގާބިނގާވެ އުޅޭ މީހުންނަށް ދަތިވާގޮތަށް ދުވާރުމަތީގައްޔާއި، އާންމު ދަތުރުފަތުރަށް ހުރަސްއެޅޭ ގޮތަށް ގަވާއިދާ ޚިލާފަށް ޕާކުކޮށްފައި ހުންނަ އުޅަނދުތައް ޓޯވކުރުމުގެ މަސައްކަތް ދިވެހި ފުލުހުންގެ ޚިދުމަތުން ފަށައިފިއެވެ.

ދިވެހި ފުލުހުންގެ ޚިދުމަތުން ސޯޝަލް މީޑިއާ މެދުވެރިކޮށް ހާމަކޮށްފައިވާ ގޮތުގައި، ހިނގާފައި އުޅޭ މީހުންގެ ހައްޤުތަކަށް ބެލުމެއްނެތި ދުވާރުތަކުގައްޔާއި މަގުތަކުގެ ޓްރެފިކަށް ބުރޫއަރާ ގޮތަށް އުޅަނދު ޕާކުކުރުމަކީ ނުރައްކާތެރި އެކްސިޑެންޓްތައް ހިނގުމަށް މެދުވެރިވާ މައިގަނޑު އެއް ސަބަބެވެ. އެހެންކަމުން، އާންމު ރައްޔިތުންގެ ފުރާނައާއި މުދަލުގެ ރައްކާތެރިކަން ކަށަވަރުކުރުމަށާއި، މަގުމަތީގެ އަމާންކަން ދެމެހެއްޓުމަށްޓަކައި އެފަދަ ތަންތަނުގައި އެއްގަމު އުޅަނދު ޕާކުނުކުރުމަށް ފުލުހުން ވަނީ ހުރިހާ ފަރާތްތަކަށް އިލްތިމާސްކޮށްފައެވެ.

ހުޅުމާލޭގައި މި އޮޕަރޭޝަން ފަށާފައިވާއިރު، މާލޭގެ ބޮޑުތަކުރުފާނުމަގުގައި ގަވާއިދާ ޚިލާފަށް ޕާކުކޮށްފައި ހުރި އުޅަނދުތައް ނެގުމުގެ މަސައްކަތް ވެސް ފުލުހުން ވަނީ މިދިޔަ ބުރާސްފަތި ދުވަހުން ފެށިގެން ކޮށްފައެވެ. މިގޮތުން، މަގުމަތި ބޭނުންކުރާ އެހެން ފަރާތްތަކަށް ދަތިވާގޮތަށް ޕާކުކޮ

ށްފައިވާ އުޅަނދުތައް އަމިއްލައަށް ނެގުމަށް ވެސް ފުލުހުން ވަނީ އުޅަނދުތަކުގެ ވެރިފަރާތްތަކަށް އަންގާފައެވެ.

ފުލުހުން އިތުރަށް ބުނެފައިވަނީ، މަގުމަތީގެ ސަލާމަތީ އުސޫލުތަކަށާއި ޓްރެފިކް ޤާނޫނާއި ގަވާއިދުތަކަށް ތަކުރާރުކޮށް ޚިލާފުވަމުންދާ ފަރާތްތަކާމެދު ޚާއްސަ ހަރުކަށި ފިޔަވަޅުތަކެއް އަޅަމުން ގެންދާނެ ކަމަށެވެ. އަދި ޓްރެފިކްގެ އާންމު އަދަބުތަކަށް ބޯނުލަނބާ މަދު ބައެއްގެ ސަބަބުން މަގު ބޭނުންކުރާ އެތައް ހާސް އާންމު ރައްޔިތުންގެ ހައްޤުތައް ގެއްލި، ނުރައްކާތެރި ހާދިސާތައް ހިނގަން ފުރުސަތު ނުދެވޭނެ ކަމަށް ވެސް ފުލުހުން ފާހަގަކޮށްފައިވެއެވެ.

މާލެއާއި ހުޅުމާލެ ހިމެނޭ ގްރޭޓަރ މާލެ ސަރަހައްދުގެ މަގުތަކުގެ ތޮއްޖެހުމާއި ޓްރެފިކްގެ މައްސަލައަށް ދާއިމީ ހައްލެއް ހޯއްދަވައިދެއްވުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން އަންނަނީ މުހިންމު ފިޔަވަޅުތަކެއް އަޅުއްވަމުންނެވެ. އެގޮތުން ޕާކިންގގެ ދަތިކަން ހައްލުކުރުމަށް ޒަމާނީ ޕާކިންގ ޒޯންތައް ޤާއިމުކުރުމުގެ މަޝްރޫޢުތައް ރޭވި، އާންމު ދަތުރުފަތުރުގެ ނިޒާމު އިތުރަށް ހަރުދަނާކޮށް ފުޅާކުރުމުގެ އަމަލީ މަސައްކަތްތައް ދަނީ ކުރެވެމުންނެވެ.

މީގެ އިތުރުން، ގަވާއިދާ ޚިލާފަށް ޕާކުކުރުން ހުއްޓުވުމަށް އެޅޭ ފިޔަވަޅުތައް އިތުރަށް ވަރުގަދަކޮށް، މާލެއާއި ހުޅުމާލެ ގުޅުވައިދޭ މަގުތަކުގެ ޓްރެފިކް ފްލޯ އޮމާންކަމާއެކު ދެމެހެއްޓުމަށްޓަކައި ޓްރެފިކް ބެލެހެއްޓުމުގެ ވިއުގައަށް ޒަމާނީ ޓެކްނޮލޮޖީއާއި ބަދަލުތައް ގެނައުމުގެ މަސައްކަތް ވެސް ކަމާބެހޭ އިދާރާތަކުން މިހާރު ދަނީ ކުރަމުންނެވެ.