މައްކާގެ މިސްކިތެއްގެ ތެރޭގައި އަޚްލާޤީ މިންގަނޑާ ޚިލާފު ޢަމަލެއް ހިންގި ކަމުގެ ކުށް ސާބިތުވި ބަންގްލަދޭޝްގެ ދެ ރައްޔިތަކަށް ސަޢޫދީ ޢަރަބިއްޔާގައި މަރުގެ އަދަބު ދީފިއެވެ.

މި ޙުކުމް ތަންފީޛުކުރުމުގެ ކުރިން އެ ޤައުމުގެ ކޮންސިއުލަރ މިޝަނަށް އެއްވެސް މަޢުލޫމާތެއް ދީފައި ނުވާތީ، ބަންގްލަދޭޝް ސަރުކާރުން މިހާރު ވަނީ މިކަމާ ގުޅޭ ރަސްމީ މައުލޫމާތު ސާފުކުރުމަށް އެދިފައެވެ.

ސަޢޫދީގެ ދާޚިލީ ވުޒާރާއިން ހާމަކޮށްފައިވާ ގޮތުގައި މަރުގެ އަދަބު ދީފައިވަނީ ނަޒީރުލް އިސްލާމް ޢަބްދުލް ބަޝީރު އަދި ސިތީ އަޚްތަރު ނަމަކަށް ކިޔާ ދެމީހުންނަށެވެ. އެ ޤައުމުގެ ރަސްމީ ނޫސް އޭޖެންސީ މެދުވެރިކޮށް އޮކްޓޯބަރު 14 ވަނަ ދުވަހު ނެރުނު ބަޔާނެއްގައި ބަޔާންކޮށްފައިވާ ގޮތުގައި، ސަލާމަތީ ބާރުތަކުން ކުރިއަށްގެންދިޔަ ތަޙުޤީޤަށްފަހު މި ދެމީހުން ހައްޔަރުކޮށް، މައްސަލަ ވަނީ ކަމާބެހޭ ކޯޓަށް ފޮނުވާފައެވެ.

ދެމީހުންގެ މައްޗަށް ކުށް ސާބިތުވުމާ ގުޅިގެން ޝަރުޢީ ހަމަތަކުގެ މަތިން ތަޢުޒީރީ އަދަބެއްގެ ގޮތުގައި ކޯޓުން ވަނީ އެ ދެމީހުން މެރުމަށް ޙުކުމްކޮށްފައެވެ. އަދި ކަމާބެހޭ މަތީ މަރުޙަލާތަކުން މި ޙުކުމް ދަމަހައްޓައި، ޝާހީ އަމުރެއްގެ ދަށުން އޮކްޓޯބަރު 14 ވަނަ ދުވަހު މައްކާގެ ސަރަޙައްދުގައި ވަނީ ޙުކުމް ތަންފީޛުކޮށްފައެވެ. ނަމަވެސް، އެ ދެމީހުން ހިންގި ކަމަށް ބުނާ ޢަމަލުގެ ތަފްޞީލެއް، އެކަން ހިނގި މިސްކިތެއް، އަދި އެމީހުން ހައްޔަރުކުރި ތާރީޚެއް ސަޢޫދީގެ ބަޔާނުގައި ހާމަކޮށްފައެއް ނުވެއެވެ.

ބަންގްލަދޭޝުން ރަސްމީ މަޢުލޫމާތަށް އެދުން

ޖިއްދާގައި ހުންނަ ބަންގްލަދޭޝްގެ ކޮންސިއުލޭޓް ޖެނެރަލުން ބުނެފައިވަނީ، މި އަދަބު ތަންފީޛުކުރުމުގެ ކުރިން އެ ފަރާތަށް އެއްވެސް މުޢާމަލާތެއް ލިބިފައި ނުވާ ކަމަށެވެ. އެ ޤައުމުގެ 'ދަ ޑެއިލީ ސްޓާރ' ނޫހުން ރިޕޯޓްކޮށްފައިވާ ގޮތުގައި، މި ޙުކުމް ތަންފީޛުކުރިކަން ރަސްމީކޮށް ކަށަވަރުކުރުމަށްޓަކައި، ކޮންސިއުލަރ މިޝަނުން ވަނީ ސަޢޫދީގެ ޚާރިޖީ ވުޒާރާއަށް ރަސްމީ ޑިޕްލޮމެޓިކް ސިޓީއެއް (ނޯޓް ވާބަލް) ފޮނުވާފައެވެ.

މީގެއިތުރުން، އެ ދެމީހުންގެ ވަނަވަރާއި، ޤައުމިއްޔަތު އަދި އެމީހުންގެ މައްޗަށް ޙުކުމް އިއްވުމާ ހަމައަށް ދިޔަ ޝަރުޢީ މަރުޙަލާތަކާ ގުޅޭ އިތުރު ތަފްޞީލު ހޯދުމަށްވެސް ބަންގްލަދޭޝްގެ އޮފިޝަލުން ވަނީ އެދިވަޑައިގެންފައެވެ.

މި މައްސަލައިގައި ރިޔާޟުން އިތުރު ތަފްޞީލީ ޖަވާބެއް ލިބޭނެ ކަމަށް ޑާކާއިން އިންތިޒާރު ކުރަމުންދާ ކަމަށް ޚަބަރުތައް ބުނެއެވެ.

ކޮންސިއުލަރ ނޯޓިފިކޭޝަނާ ގުޅޭގޮތުން އުފެދިފައިވާ ސުވާލުތައް

މި ޙާދިސާއާ ގުޅިގެން، ބޭރު ޤައުމުތަކުގައި ބޮޑެތި ޖިނާއީ ކުށްތަކުގެ ތުހުމަތު ކުރެވޭ ރައްޔިތުންނަށް ޑިޕްލޮމެޓިކް މިޝަންތަކުން ފޯރުކޮށްދޭންޖެހޭ އެހީތެރިކަމާއި، ކޮންސިއުލަރ މުޢާމަލާތްތައް ހިނގަންޖެހޭ ގޮތާމެދު ވަނީ ސުވާލުތައް އުފެދިފައެވެ.

ބަންގްލަދޭޝާއި ސަޢޫދީ ޢަރަބިއްޔާއަކީ ވެސް 'ވިއެނާ ކޮންވެންޝަން އޮން ކޮންސިއުލަރ ރިލޭޝަންސް' ގެ ބައިވެރިންނެވެ. މި މުޢާހަދާގެ ދަށުން، ހައްޔަރުކުރެވޭ ބޭރު ޤައުމުތަކުގެ ރައްޔިތުންނާއި އެމީހުންގެ ކޮންސިއުލަރ މަންދޫބުންނާ ދެމެދު މުޢާމަލާތު ކުރެވޭނެ އިންތިޒާމުތައް ހަމަޖައްސައިދޭން ޖެހެއެވެ.

ނަމަވެސް، މި މައްސަލައިގައި ކުށުގެ ތަފްޞީލު ނުވަތަ ބަންގްލަދޭޝްގެ ކޮންސިއުލަރ މިޝަނަށް ކުރިން އެންގިފައި ނުވާ ސަބަބާ ގުޅޭގޮތުން ސަޢޫދީގެ ކަމާބެހޭ އިދާރާތަކުން ޢާންމުކޮށް އެއްވެސް އިތުރު ބަޔާނެއް ނެރެފައެއް ނުވެއެވެ.

ޢާންމުވެފައިވާ މަޢުލޫމާތުތަކަށް ބަލާއިރު، ކޮންސިއުލަރ މުޢާމަލާތްތައް ހިނގާފައިވާ ވަގުތާއި ޝަރުޢީ އިޖުރާއާތުތައް ކުރިއަށްދިޔަ ގޮތް ހިމެނޭހެން، މި މައްސަލައިގެ ގިނަ ކަންތައްތަކެއް އަދިވެސް ވަނީ ސާފުނުވެއެވެ.