އިންސާނިއްޔަތު ސަލާމަތް ކުރުމަށް ވަރުބަލިކަމެއް ނެތި މިއަދާއި، އަދި ކޮންމެ ދުވަހަކު ވެސް ޑޮކްޓަރުން ކުރަށްވަމުން ގެންދަވާ މަސައްކަތުގެ އަގު ވަޒަންކުރަށްވާ ކަމަށް ހެލްތް މިނިސްޓަރ ޢަބްދުﷲ އަމީން ވިދާޅުވެއްޖެއެވެ.

ރާއްޖޭގައި މިއަދު ފާހަގަ ކުރަމުންދާ ޑޮކްޓަރުންގެ ދުވަހުގެ މުނާސަބަތުގައި ހެލްތް މިނިސްޓަރ އަމީން ކުރަށްވާފައިވާ ޓްވީޓެއްގައި ވިދާޅުވެފައިވަނީ، މި އުނދަގޫ ދަތި ވަގުތުގައި، ޞިއްޙީގޮތުން ރައްޔިތުންނަށް ފޯރުކޮށްދޭން ޖެހޭ އެންމެ ފުރިހަމަ ޚިދުމަތްތައް ފޯރުކޮށްދިނުމަށްޓަކައި، ސާބިތުކަމާއެކު ދެމިތިއްބެވިކަމަށްޓަކައި އެންމެހާ ޑޮކްޓަރުންނަށް ޝުކުރުވެރިވާ ކަމަށެވެ.

މިއަދު ރާއްޖޭގައި ދިވެހި ޑޮކްޓަރުންގެ ދުވަސް ފާހަގަ ކުރަމުންދާ މި ވަގުތަކީ، ޞިއްޙީ ޚިދުމަތުގެ ތާރީޚުގައިވެސް ޑޮކްޓަރުން ކުރިމަތިލާން ޖެހިފައިވާ އެންމެ ބޮޑު ގޮންޖެހުން ކުރިމަތި ވެފައިވާ ވަގުތެވެ. ކޯވިޑް-19 ގެ ރޯގާ ބަލިމަޑުކަން ދިވެހި މުޖްތަމަޢާ މި ލައިގަތީ ރާއްޖޭގެ ވެރިކަންކުރާ މާލެ ސިޓީ އިން ކޯވިޑް-19 އަށް ޕޮޒިޓިވް 12 މީހަކު ފެނިފައިވާ ވަގުތެއްގައެވެ.

މިކަމާ ގުޅިގެން ރައްޔިތުން ބޮޑު ބިރުވެރި ކަމެއްގައި ތިބިއިރު، ޑޮކްޓަރުންނާއި، ސިއްޙީ ދާއިރާގެ ތަޖްރިބާކާރުން ގެންދަވަނީ މި ބަލިމަޑުކަމުން އަރައިގަތުމަށް ކުރެވެން ހުރި ހުރިހާ މަސައްކަތެއް ކުރަމުންނެވެ.