ލޮކްޑައުންގެ ވަގުތުގައި މަގުމަތީގައި އުޅޭ މީހުންނަށް ދެން ނަސޭހަތް ނުދޭނެ ކަމަށާއި، އެފަދަ މީހުންނާމެދު ދެން އަޅާނީ ޤާނޫނީ ފިޔަވަޅު ކަމަށް އެސިސްޓެންޓް ކޮމިޝަނާ އޮފް ޕޮލިސް އަބްދުﷲ ފައިރޫޝް ވިދާޅުވެއްޖެއެވެ.

މިރޭ ބޭއްވި ނޫސްވެރިންގެ ބައްދަލުވުމުގައި ފައިރޫޝް ވިދާޅުވީ، މިރެއިން ފެށިގެން މަގުތަކުގައި އުޅޭ މީހުންނަށް ނަސޭހަތް ނުދޭނެ ކަމަށާއި އޭގެ ބަދަލުގައި ޖޫރިމަނާކޮށް އަދި ދެން ވެސް އެޅެން ހުރި ގާނޫނީ ފިޔަވަޅުތައް އަޅާނެ ކަމަށެވެ.

މިގޮތަށް ޖޫރިމަނާ ކުރާ މީހުން ޖޫރިމަނާ ކުރާނީ 1،000 ރުފިޔާ އިންނެވެ.

"މިއަދު މި ޕްރެސްއަށް ފަހު އަޅުގަނޑު ދަންނަވާލަން ބޭނުން ވޭ އަޅުގަނޑުމެން އިތުރަށް އެއްވެސް ފަރާތަކަށް ނަސޭހަތް ދިނުމުގެ މަސައްކަތެއް ނުކުރާނަން. މަގުމަތީގައި އެއްވެސް ފަރާތަކުން މި ލޮކްޑައުންގެ އުސޫލުތަކާއި ހިލާފަށް ބޭރުގަ އުޅެންޏާ ފެށޭނީވެސް ޖޫރިމަނާއިން. އެއަށްފަހު ޕީނަލް ކޯޑުގެ 533 ވަނަ މާއްދާގެ ދަށުން އަޅަން ޖެހޭ ފިޔަވަޅުތަކެއް އަޅާނަން." ފައިރޫޝް ވިދާޅުވިއެވެ.

ފައިރޫޝް ވިދާޅުވީ، ރެއާއި ހަމައަށް 39 ފަރާތެއް ޖޫރިމަނާ ކޮށްފައިވާނެ ކަމަށާއި، އަދި ގަވާއިދާއި ހިލާފުވެގެން މީހަކު ހައްޔަރު ކުރެވިފައި ނުވާ ކަމަށެވެ.

ފައިރޫޝް ވިދާޅުވީ، މީގެ ކުރިން ފިޔަވަޅުތައް އަޅަމުން ގެންދިޔައީ މީހުންނަށް ދަތި ނުވާނެ ގޮތްތަކަށް ބަލައިގެންނެވެ.

"އަޅުގަނޑުމެން މި ފިޔަވަޅުތައް އަޅަމުން ގެންދަނީ ވީހާވެސް ފްލެކްސިބަލްކޮށް، އެހެން ނަމަވެސް އެންމެންނަށްވެސް މިކަމުގެ ތެރެއިން ދަތި ނުވާނެ ގޮތް ތަކަކަށް ބަލައިގެން." ފައިރޫޝް ވިދާޅުވިއެވެ.

ރާއްޖެއިން މިހާތަނަށް ކޯވިޑް-19ގެ 52 ކޭސް ފެނިފައިވާއިރު، އޭގެ ތެރެއިން 31 މީހަކު ފައްސިވެފައި ވަނީ މާލެ އިންނެވެ. އަދި މިއަދު ވަނީ ފުރަތަމަ ފަހަރަށް އަތޮޅެތެރޭގައި މީހުން ދިރިއުޅޭ ރަށަކުން ދިވެއްސަކު މި ބައްޔަށް ފައްސިވެފައެވެ.