ބިދޭސީންގެ މެދުގައި ކޯވިޑް-19 ފެތުރެމުންދާ ނިސްބަތަށް ބަލާއިރު، އިތުރު ފިޔަވަޅުތަކެއް އަޅަން ޖެހޭ ކަމަށް ގަބޫލުކުރެވޭ ކަމަށް އެސިސްޓަންޓް ކޮމިޝަނަރ އޮފް ޕޮލިސް އަބްދުﷲ ފައިރޫޝް ވިދާޅުވެއްޖެއެވެ.

ނޭޝަނަލް އިމަޖެންސީ އޮފަރޭޝަން ސެންޓަރު (އެންއީއޯސީ)ގައި ފުލުހުން މިރޭ ބޭއްވި ނޫސްވެރިންގެ ބައްދަލުވުމުގައި އޭސީޕީ ފައިރޫޝް ވިދާޅުވީ ބިދޭސީންނާ ގުޅޭގޮތުން ގިނަ ދަތިތަކެއް އެބަހުރި ކަމަށާއި ބައެއް ސަރަހައްދުތަކުގައި ގަވައިދާ ހިލާފަށް އުޅޭ ބިދޭސީންތަކެއް އުޅޭ ތަންތަން އެބަހުރި ކަމަށެވެ.

"އެހެންވީމާ އެކަންކަމާ ގުޅިގެން އަޅުގަނޑުމެން މިހާރު މި ވިސްނަމުންދާ ގޮތަކީ އިތުރު ކޮންޓްރޯލް މެޝާސްތަކެއް ލާފައި، އަދި އެތަންތަނަކީ ކާއެއްޗެހި ކޮންމެވެސް ސިސްޓަމެއްގެ ތެރެއިން ޑެލިވާކުރެވޭނެ ގޮތް ހެދުމަށް. އޭގެ ބޭނުމަކީ ބިދޭސީން މަގުމައްޗަށް ނުނުކުމެވޭ ގޮތް ހެދުން. އެ ފަރާތްތަކާ ކޮންޓެކްޓްވާ މީހުންގެ އަދަދު ވެސް މަދުކުރުން." އޭނާ ވިދާޅުވިއެވެ.

ފައިރޫޝް ވިދާޅުވީ ބައެއް ބިދޭސީން މިސްކިތްތަކުން ލިބެން ހުންނަ ފެން ބޭނުންކޮށްލައިގެން ސާފުވުމާއި މިސްކިތުގެ ތެރޭގައި ނިދުން ފަދަ ކަންކަން ކޮންމެވެސް ވަރަށް ހިނގަމުންދާކަން ފާހަގަކުރެވޭ ކަމަށާއި ކުރިއަށްއޮތް ތަނުގައި މިސްކިތްތަކުން ފެން ލިބެން ނުހުންނާނެ ކަމަށެވެ.

"މިސްކިތުން ލިބެން ހުންނަ ފެން ބޭނުންކޮށްލައިގެން ސާފުވުމާއި އަދި މިސްކިތުގެ ތެރޭގައި ނިދުމާއި މިކަހަލަ ކަންތައް ކޮންމެވެސް ވަރަކަށް ހިނގަމުންދާކަން. އެހެންނަމަވެސް ކުރިއަށްއޮތް ތަނުގައި މިސްކިތްތަކުން ފެން ލިބޭކަށް ނުހުންނާނެ." އޭނާ ވިދާޅުވިއެވެ.

މިއަދު މާލެއިން ވަނީ 16 ބިދޭސީއަކު ކޯވިޑް-19 އަށް ޕޮޒިޓިވް ވެފައެވެ. އޭގެ ތެރޭގައި ލިލީ އެންޓަޕްރައިޒަސްގައި މަސައްކަތްކުރާ ބަންގުލަދޭޝްގެ 13 މީހަކާއި، ބްރައިޓް ބްރަދާސްގައި މަސައްކަތްކުރާ އިންޑިއާގެ ދެ މީހަކު ހިމެނެއެވެ. ބަންގުލަދޭޝްގެ 13 މީހުންނަކީ އެއް ތަނެއްގައި ދިރިއުޅޭ 13 މީހުންނެވެ.