ބިދޭސީންނަށް ކާބޯތަކެތި ނުވިއްކާ، ބައެއް ދިވެހިން އެމީހުންނާއިމެދު އިހާނެތިކޮށް ހިތަމުން އަންނަކަމަށް ކުރީގެ ހޯމް މިނިސްޓަރ އުމަރު ނަސީރު ވިދާޅުވެއްޖެއެވެ.

އުމަރު ނަސީރު މިރޭ ކުރައްވާފައިވާ ފޭސްބުކް ޕޯސްޓެއްގައި ވަނީ ބިދޭސީ މަސައްކަތު މީހުންނަށް ފިހާރަތަކުން ކާބޯތަކެތި ނުވިއްކައި އެމީހުން ފިހާރަތަކުން ނެރެމުން އަންނަ ކަމަށެވެ.

ބިދޭސީން ފިހާރަތަކަށް ދިއުމުން އޮންލައިންކޮށް އޯޑަރ ކުރުމަށް އެންގުމަށްފަހު، އެމީހުން ފިހާރައިން ނެރެލުމަކީ ވަރަށް ދެރަ ކަމެއް ކަމަށް އުމަރު ސިފަ ކުރަށްވާފައިވެއެވެ. އަދި އޮންލައިންކޮށް ތަކެތި ހޯދުމުގައި ދިވެހީންނަށްވެސް އުފުލަންޖެހޭ ތަކްލީފަށް ބަލާއިރު ބިދޭސީންނާ މެދު އެގޮތަށް ޢަމަލު ނުކުރުމަށް އުމަރު ވަނީ އެދިވަޑައިގެންފައެވެ.

"އެތައް ބިދޭސީންނެއް ތިބީ ބަނޑުހައި ހޫނުކަން މަތީ. ސަރުކާރުން މިކަމަށް އަވަސް ފިޔަވަޅުތަކެއް އަޅުއްވައި ދެއްވުމަށް ދަންނަވަން." އުމަރު ވިދާޅުވެފައި ވެއެވެ.

ރާއްޖޭގައި އެތައްހާސް ބިދޭސީންނެއް އުޅެމުން އަންނައިރު، އޭގެ ތެރެއިން ގިނަ މީހުން ރާއްޖޭގައި އުޅެނީ ވަރަށްދަތި ޙާލުގައެވެ. އެމީހުން ނިންދަވަނީ ވަރަށް ކުދި ތަންތަން ކޮޅުގައި ތޮއްޖައްސުވައިގެންނެވެ. އަދި އެމީހުންނަށް ބަރާބަރަށް މުސާރަ ނުދިނުދޭތާ ދިރިއުޅޭނެ ރަނގަޅު މާހައުލެއް ނުދެއްކުން ފަދަ މައްސަލަތަކަކީ ރާއްޖޭގައި ފެންމަތުވަމުން އަންނަތާ އެތައް ދުވަހެއް ވެފައިވާ މައްސަލަ ތަކެކެވެ.

ސަރުކާރުން މިހާރު ވަނީ ޤަވާއިދާ ޚިލާފަށް ރާއްޖޭގައި އުޅޭ ބިދޭސީން، އެމީހުންގެ ޤައުމަށް އަނބުރާ ފޮނުވާލުމުގެ މަސައްކަތް ފަށާފައެވެ.