ރޭކުރި ވިއްސާރައިގައި ފަރުކޮޅުފުށީގެ ވޯޑެއްގައި ފެންބޮޑުވެ ގެއްލުންތަކެއް ވެއްޖެއެވެ.

ނޭޝަނަލް އިމަރޖެންސީ އޮޕަރޭޝަން ސެންޓަރު ގައި މިރޭ ބޭއްވި ނޫސްވެރިންގެ ބައްދަލުވުމުގައި، ޓާސްކްފޯސްގެ ތަރުޖަމާން މަބްރޫކް އަޒީޒް ވިދާޅުވީ، ފަރުކޮޅުފުށީގެ ވޯޑަކަށް ވާރޭ ވެހި އެވޯޑުގެ ތެރޭގައި ފެންބޮޑުވެފައިވާ ކަމަށެވެ. އަދި ފެންބޮޑުވުމުގެ ސަބަބުން ކަރަންޓު ޝޯޓެއްވެ ކަރަންޓު ކެނޑުނު ކަމަށް ވެސް މަބްރޫކް ވިދާޅުވިއެވެ.

މިވޯޑުން ކަރަންޓު ކެނޑުމާއި ގުޅިގެން ވޯޑުގައި ތިބި ހުރިހާ ބަލިމީހުން އެހެން ވޯޑަކަށް ބަދަލުކުރެވިފައިވާ ކަމަށާއި، މީގެއިތުރުން ކަރަންޓުގެ މައްސަލަތަކާއި ލީކުވުމުގެ މައްސަލަތައް ހައްލުކުރުމަށް މިހާރު މަސައްކަތް ކުރަމުންދާކަމަށްވެސް މަބްރޫކް ވިދާޅުވިއެވެ.

ފަރުކޮޅުފުށީގައި މަދިރި ގިނަ ކަމުގެ ޝަކުވާތައް ލިބޭ ކަމަށާއި، އެކަމަށް ހައްލެއް ހޯދަން ފޮގް ކުރުމާއި އެކު ޔޫވީ ލައިޓް ހަރުކޮށްފައިވާ ކަމަށް މަބްރޫކް ވިދާޅުވިއެވެ.