އަވަށްޓެރި އިންޑިއާގައި ކޮވިޑް 19 ކޮންޓްރޯލްނުވެ، ހާލަތު އިތުރަށް ގޯސްވަމުންދާތީ ކަންބޮޑުވެވަޑައިގަންނަވާ ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު މިއަދު ވިދާޅުވެއްޖެއެވެ.

އިންޑިއާގައި ކޮވިޑް-19ގެ ހާލަތު ވަރަށް ބޮޑަށް ގޯސްވެ އެގައުމުގެ ބައެއް ހިސާބުތަކުގައި ބަލި މީހުންނަށް ފަރުވާ ނުދެވި އަޅާނުލެވި މަރުވާން ދޫކޮށްލަން މަޖުބޫރުވެފައިވާއިރު ގިނަބައަކު އެއްފަހަރާ މަރުވާތީ މަރުވާ މީހުންގެ ޖަނާޒާ ބޭއްވުމަށްވެސް ވަނީ ނުކުޅެދިފައެވެ.

މިކަމާ ގުޅިގެން ރައީސް ސޯލިހު މިއަދު ކުރެއްވި ޓުވީޓެއްގައި ވިދާޅުވީ އަވަށްޓެރި އިންޑިއާއަށް ކުރިމަތިވެފައިވާ ކޮވިޑުގެ ދެވަަނަ ރާޅާއެކު ހާލަތު ގޯސްވަމުންދާތީ ކަންބޮޑުވެވަޑައިގެން، ހަމްދަރުދީވެ ވަޑައިގަންނަވާކަމަށެވެ. އަދި ދިވެހިރާއްޖެ އޮތީ އިންޑިއާގެ ރައްޔިތުންނާ އެކުގައިކަމަށްވެސް ރައީސް ވިދާޅުވިއެވެ.

Saddened and concerned for our neighbour India as they battle a new wave of Covid19. The Maldives expresses its solidarity with the people of India and is encouraged by the efforts undertaken by PM @narendramodi and Indian authorities to ease the situation.

— Ibrahim Mohamed Solih (@ibusolih) April 28, 2021

ރައީސް ސޯލިހު ވަނީ ކޮވިޑާ ދެކޮޅަށް އެ ގައުމުގެ ބޮޑުވަޒީރު ނަރެންދްރަ މޯދީއާއި އިންޑިއާގެ ވުޒާރާތަކުން އަޅަމުންގެންދާ ފިޔަވަޅުތައް ފާހަގަކުރައްވައި އެފަރާތްތަކަށް ތައުރީފް ކުރައްވާފައެެވެ.

އިންޑިއާގައި ކޮވިޑް-19ގެ ހާލަތު ގޯސްވެ ޑަބްލިއުޗްއޯއިން ވަނީ ކޮވިޑްގެ ނުރައްކާ އެންމެ ބޮޑު ގައުމުތަކުގެ ތެރޭގައި އެ ގައުމު ކަނޑައަޅާފައެވެ. ރާއްޖެއިންވެސް މިހާރު ވަނީ އިންޑިއާއިން ރާއްޖެ އަންނަ ފަތުރުވެރިންނަށް ގެސްޓްހައުސްތަކާއި ސިޓީހޮޓާތަކުގައި ތިބުން މަނާކޮށްފައެވެ.