ލާމަރުކަޒީ ނިޒާމަށް ގެނެވުނު އައު މުހިންމު އިސްލާހުތައް ތަންފީޒުކުރުމުގެ ބޮޑެތި ޒިންމާތައް އަލަށް ހުވާކުރި ސިޓީ ކައުންސިލްތަކާއި އަތޮޅު ކައުންސިލްތައް އަދި ރަށު ކައުންސިލްތަކަށް އޮންނާނެ ކަމަށް ހޯމް މިނިސްޓަރު އިމްރާން އަބްދުﷲ ވިދާޅުވެއްޖެއެވެ.

ހަތަރުވަނަ ދައުރަކަށް މިއަދު ހުވާކުރެއްވި ކައުންސިލަރުންނާއި އަންހެނުންގެ ތަރައްގީއަށް މަސައްކަތްކުރާ ކޮމިޓީތަކުގެ މެމްބަރުންނަށް މަރުހަބާ ވިދާޅުވެ ލޯކަލް ގަވަރުމަންޓް އޮތޯރިޓީގެ ރައީސް އަދި ހޯމް މިނިސްޓަރ އިމްރާން އަބްދުﷲ ވިދާޅުވީ، ނިޒާމަށް ގެނެވުނު އިސްލާހުތައް ތަންފީޒްކުރުމުގެ ބޮޑެތި ޒިންމާތަކެއް އައު ކައުންސިލްތަކަށް މަތިކުރެވިފައިވާ ކަމަށެވެ.

Laamarukazee Qaanoonah genevunu muhimmu islaahuthakaa eku, 4 vana dhaurah inthikhaabve miadhu maqaamaa havaaluvevadaigennevi councilarunnashaa WDCs ge memberunnah maruhabaa dhannavan. Nizaamah genevunu islahuthah thanfeez kurumuge bodethi zimmaathakeh aa council thakah onnaane.

— Imran Abdulla (@ShimranAb) May 17, 2021

ލާމަރުކަޒީ ނިޒާމުން އިދާރީ ދާއިރާތައް ހިންގުމުގެ ގާނޫނަށް މިސަރުކާރުން ވަނީ ބޮޑެތި ބަދަލުތަކެއް ގެނަސްފައެވެ. އެގޮތުން އެ ކައުންސިލެއްގެ އިހުތިޞާޞްގެ ތެރޭގައި ހިމެނޭ ރަށްރަށާއި ބިމާއި ފަޅު ފަދަ ތަންތަނުގެ ބާރުވެރިކަން ކައުންސިލަށް އޮތުމާއި އެތަންތައް ކުއްޔަށްދީގެން ނަފާ ހޯދުން ފަދަ ކަންކަންވެސް ކައުންސިލްތަކުގެ ބާރުގެ ދަށަށް ބަދަލު ކުރުން ހިމެނެއެވެ. މީގެއިތުރުން ރަށުގެ ތަރައްގީއަށް ހިންގާ ކަންކަން ކަނޑައެޅުމާއި ހިންގުމުގެ ބާރުވެސް ކައުންސިލަށް އޮތުމާއެކު ދައުލަތުގެ ބެޖެޓުން ކައުންސިލްތަކަށް ވަކިވަރެއް ކަނޑައަޅައި ކައުންސިލްތަކަށް އެ ބަޖެޓު ދިނުން ވެސް އިސްލާހު ތަކުގެ ތެރޭގައި ހިމެނެއެވެ.

ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނަށް ނުވަވަނަ އިސްލާހުގެނައުމުގެ ބިލް ރައީސް އިބްރާހިމް މުހައްމަދު ސޯލިހު ތަސްދީގުކުރައްވާފައި ވަނީ މިދިޔަ އަހަރުގެ ޑިސެމްބަރު މަހުގެ 23 ވަނަ ދުވަހުއެވެ.