ބަލިޖެހިފައިވާ މީހަކާ ކޮންޓެކްޓް ވެގެން ކަރަންޓީނުގައި ހުންނައިރު 14 ދުވަސް ހަމަވުމުގެ ކުރިން ޓެސްޓެެއް ހަދައި ނެގެޓިވް ނަތީޖާ ލިބުމުން ބައެއް މީހުން ބޭރުގައި އުޅޭކަން ފާހަގަކުރެވޭ ކަމަށް ޑރ. ނަޒްލާ މުސްތަފާ މިރޭ ވިދާޅުވެއްޖެއެވެ.

ހެލްތް އިމަޖެންސީ އޮޕަރޭޝަން ސެންޓަރު ( އެޗްއީއޯސީ) މިރޭ ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ޑރ. ނަޒްލާ މުސްތަފާ ވިދާޅުވީ، ކަރަންޓީނުގައި ތިބޭ ބައެއް ފަރާތްތަކުން 14 ދުވަސްވުމުގެ ކުރިން ޕީސީއާރު ޓެސްޓެއް ހެދުމަށްފަހު ނެގެޓިވް ނަތީޖާ ލިބުމުން ބޭރަށް ނުކުމެ އުޅޭކަން ފާހަގަކުރެވޭ ކަމަށެވެ. އެހެންނަމަވެސް އެއީ ކޮށްގެންވާނެ ކަމެއް ނޫން ކަމަށާއި 14 ދުވަސް ތެރޭގައި އެމީހާއަށް ބަލިޖެހުުމުގެ ފުރުސަތު އޮތުމުން އެމީހާގެ ސަބަބުން މުޖުތަމައު ތެރޭގައި ބަލި ފެތުރޭނެ ކަމަށް ޑރ. ނަޒްލާ ވިދާޅުވިއެވެ. އެހެންކަމުން ކަރަންޓީނު 14 ދުވަސް ފުރިހަމަކުރުމަށާއި ކަރަންޓީނު މުއްދަތުގެ ތެރޭގައި ބޭރަށް ނިކުމެ ނޫޅުމަށް ޑރ. ނަޒްލާ ވަނީ އިލްތިމާސްކުރައްވާފައެވެ.

"މިހާރު އެބަ ފާހަގަކުރެވޭ ކަރަންޓީނުގައި ތިބޭ މީހުން ކޮންޓެކެޓުން ސާމްޕަލް ދީފައި މާލޭގައާއި ރަށްރަށުގައި ވެސް ބޭރަށް ނުކުމެ އެކި މީހުންނާއި ބައްދަލުވެފައިވާކަން، ކަރަންޓީނުގެ މާނައަކީ 14 ދުވަހު ކަރަންޓީނުގައި ހުރުމަށްފަހު ސާމްޕަލް ނަގައި ނެގެޓިވް ނަތީޖާ ލިބުމުން އެކަނި ނުކުތުން، ބައެއް މީހުން ހަދާގޮތަކީ 14 ދުވަސް ހަމަނުވަނީސް ޓެސްޓެއް ހަދާލާފައި އެބަ ބޭރަށް ނިކުމޭ 14 ދުވަސް ތެރޭގައި އޮންނާނެ ރިސްކެއް ޕޮޒިޓިވްވުމުގެ، އަބަދުވެސް ވިސްނަންވާނެ ތިމާގެ ފަރާތުން ބަލި ފެތުރުނަ ނުދިނުމަށް." ނަޒްލާ ވިދާޅުވިއެވެ.

ހެލްތު އިމަޖެންސީ އޮޕަރޭޝަން ސެންޓަރުން މިރޭ ބުނީ ކަރަންޓީނުގައި ހުންނައިރު ދެ ފަހަރަށް ސާމްޕަލް ނެގުމުގެ މާބޮޑު މާނައެއް ނެތްކަމަށެވެ. އެހެން ނަމަވެސް ކަރަންޓީނުގައި ހުންނައިރު ބަލީގެ އެއްވެސް އަލާމާތެއް ފެނިއްޖެނަމަ ލަސްނުކޮށް އެކަން އެންގުމަށް އެޗްއީއޯސީ އިން ވަނީ އިލްތިމާސްކޮށްފައެވެ.