ސްކޫލް ދަރިވަރުންގެ ފޮތްތަކުގައި ނަފުރަތު އުފެއްދުމަށް މަގުފަހިވާގޮތަށް ހުރި ބައިތައް ބަލައި، މަންހަޖަށް ބަދަލުގެނައުމުގެ މަސައްކަތް އެޑިއުކޭޝަން މިނިސްޓްރީން ފަށައިފިއެވެ.

އެޑިއުކޭޝަން މިނިސްޓްރީން މިމަސައްކަތް ފަށާފައިވާކަން ހާމަކޮށްފައިވަނީ އެމްޑީޕީގެ މެއި 6 ކޮމިޓީއާ އެޑިއުކޭޝަން މިނިސްޓަރ އައިޝަތު އަލީ ބައްދަލުކުރައްވައި ދެއްކެވި ވާހަކަފުޅުގައިކަމަށް އެކޮމިޓީގެ މުގައްރިރު ހަސަން އަފީފު ވަނީ ވިދާޅުވެފައެވެ.



މެއި 6 ކޮމިޓީގެ މުޤައްރިރު ރައްޔިތުންގެ މަޖިލީހުގެ ވިލުފުށީ ދާއިރާގެ މެންބަރު ޙަސަން ޢަފީފް ވިދާޅުވީ އެންމެ ފަހުން އެ ކޮމިޓީން އެޑިއުކޭޝަން މިނިސްޓްރީއާއެކު އޮގަސްޓް 26 ވަނަ ދުވަހު ބޭއްވި ބައްދަލުކުރެއްވުމުގައި ހަރުކަށި ފިކުރަށް ސްކޫލް ކުދިންގެ ފިކުރު ބަދަލުކުރުމަށް އެކުދިންގެ ވިސްނުމާ ކުޅެން މަސައްކަތްކުރާކަން އެ މިނިސްޓްރީއަށް ވަނީ ފާހަގަވެފައިވާކަން މިނިސްޓަރ ހާމަކުރެއްވިކަމަށެވެ.



އެމަސައްކަތް ހުއްޓުވުމަށްއިންޓަނެޓް މެދުވެރިކޮށް ކުދިން ގްރޫމްކުރުމަށް މަސައްކަތް ކުރަމުންދާއިރު، މިކަމަށް ބެލެނިވެރިން އަހުލުވެރިކުރުމަށް ދަނީ މަސައްކަތްކުރަމުންދާކަމަށާއި، އަދި މިކަމަށް ޚާއްސަ އަތްމަތީ ފޮތެއް ތައްޔާރުކުރުމުގެ މަސައްކަތް ވެސް ކުރަމުންދާކަމަށް މިނިސްޓްރީން ވިދާޅުވިކަމަށް އަފީފް ވިދާޅުވެފައިވެއެވެ. މީގެ އިތުރުން މިކަން ހައްލުކުރުމުގައި މުދައްރިސުންގެ ދައުރު ބޮޑުއިރު، އެކަމަށް ޚާއްސަ ޕްރޮގްރާމްތައް ހިންގުމަށް ވެސް ވަނީ ރާވާފައެވެ.

ސްކޫލް ދަރިވަރުންގެ ފޮތްތަކުގައި ނަފުރަތު އުފެއްދުމަށް މަގުފަހިވާގޮތަށް ހުރި ބައިތައް ބަލައި، މަންހަޖަށް ބަދަލުގެނައުމުގެ މަސައްކަތް އެޑިއުކޭޝަން މިނިސްޓްރީން ފަށާފައިވާކަމަށް އެމްޑީޕީން ބުނި ނަމަވެސް، އެޑިއުކޭޝަން މިނިސްޓްރީން މިކަމާއި ގުޅޭގޮތުން ރަސްމީކޮށް ވާހަކަދައްކާފައެއް ނުވެއެވެ.

ސްކޫލް ދަރިވަރުންގެ ފޮތްތަކުގައި ނަފުރަތު އުފެއްދުމަށް މަގުފަހިވާގޮތަށް ބައިތައް ހުރިކަމަށް ބައެއް ފަރާތްތަކުން ބުނިނަމަވެސް، ކިޔަވައިދެއްވާ ބައެއް ޓީޗަރުން އެކަން ދޮގުކުރެއެވެ.