ރައީސް ޔާމިންގެ ސަރުކާރުން ހިންގި ބޯހިޔާވަހިކަމުގެ މަޝްރޫޢުގެ ދަށުން ޢިމާރާތްކޮށްފައިވާ ހިޔާ ފްލެޓްތައް ލިބިފައިވާ ފަރާތްތަކުން އެ ފްލެޓްތައް ކުއްޔަށް ދިނުމަށް އިޝްތިހާރު ކުރަން ފަށައިފިއެވެ.

އިޖުތިމާއީ ބޯހިޔާވަހިކަމުގެ ދަށުން ސަރުކާރުން ދޫކުރާ ފްލެޓްތައް ކުއްޔަށް ދޫކުރުމަކީ މަނާކަމެއް ކަމަށް ފްލެޓް އެއްބަސްވުންތަކުގައި ވަނީ ބުނެފައެވެ. އަދި ފްލެޓް ލިބުނު ފަރާތްތަކުން އެހެން ފަރާތްތަކަށް ފްލެޓް ކުއްޔަށް ދޭނަމަ ފްލެޓް އަތުލާނެ ކަމަށް ހައުސިން މިނިސްޓަރ މުޙައްމަދު އަސްލަމްވެސް މީގެ ކުރިން ވިދާޅުވެފައިވެއެވެ.

އެހެން ނަމަވެސް ހިޔާ ފްލެޓް ލިބިފައިވާ ބައެއް ފަރާތްތަކުން ދަނީ ފްލެޓް ކުއްޔަށް ދޫކުރުމަށް ފޭސްބުކް ޕޭޖުތަކާއި ވައިބާ ގުރޫޕްތަކުގައި އިޝްތިހާރު ކުރަމުންނެވެ. އެގޮތުން ހިޔާ ފްލެޓް ކުއްޔަށް ދޭން އިޝްތިހާރު ކުރަމުންދަނީ 10،000 ރުފިޔާ އަށެވެ. ހިޔާ ފްލެޓްތަކުގެ އަސްލު ކުލީގެ އަގަކީ 7500 ރުފިޔާ އެވެ. އަދި މެއިންޓެނަންސް ފީގެ ގޮތުގައި 1000 ރުފިޔާ ނަގައެވެ.

ހިޔާ މަޝްރޫއުގެ ފްލެޓްތަކުގެ އަދަދަކީ 7،000 ކަމުގައި ރައީސް ޔާމީންގެ ސަރުކާރުން ކަނޑައަޅާފައި އޮތް ނަމަވެސް ފްލެޓް ތަކުގެ ގްރައުންޑް ފްލޯ، ޓަވަރުތަކުގައި ދިރިއުޅޭ މީހުންގެ އަސާސީ ބޭނުންތަކުގެ ވިޔަފާރިއަށް މި ސަރުކާރުން ހާއްސަ ކުރުމުން އެ އަދަދު ވަނީ 6،720 އަށް މަދުވެފައެވެ.

ހިޔާ ފްލެޓްތައް ހަވާލުކުރުމުގެ މަސައްކަތްކުރަމުންދާއިރު، އެ ފްލެޓްތަކުން ކުލި ނަގަން ފަށާނީ އަންނަ ޑިސެމްބަރުމަހުން ފެށިގެންކަމަށް އެޗްޑީސީން ވަނީ ހާމަކޮށްފައެވެ.