އެމްޑީޕީގެ ދަފްތަރުގައި 93،000 މީހުން އެބަ ތިބި ކަމަށް އެޕާޓީން ހާމަކޮށްފިއެވެ.

އެމްޑީޕީން މިއަދު ވަނީ އެޕާޓީގެ ޤައުމީ މަޖިލީހުގެ އިންތިޚާބުގައި ވޯޓުލުމަށް ޝަރުތު ހަމަވާ މީހުންގެ ލިސްޓް ޢާއްމުކޮށްފައެވެ. އެގޮތުން އެޕާޓީގެ ދަފްތަރުގައި 93،354 މެމްބަރުން އެބަތިބިކަން އެލިސްޓުން ހާމަވެއެވެ.

މިމަހުގެ 25 ވަނަ ދުވަހު ބޭއްވުމަށް ހަމަޖެހިފައިވާ، އެމްޑީޕީގެ ޤައުމީ މަޖިލީހުގެ އިންތިޚާބުގައި ވޯޓުލެވޭ މީހުންގެ ލިސްޓު ޢާއްމުކޮށްފައިވާއިރު ލިސްޓަށް ޝަކުވާ ހުށައެޅުމުގެ ފުރުސަތު މި މަހުގެ 13ގެ ނިޔަލަށް އޮންނާނެ ކަމަށް އެޕާޓީން ވަނީ ބުނެފައެވެ.

އިއުލާނު: MDP/2021/0021 ދާއިރާތަކުގެ އިންތިޚާބު 2021 ގައި ވޯޓުލާ މީހުންގެ ދާއިމީ ލިސްޓު އާންމު ކުރުން – Maldivian Democratic Party https://t.co/Ergx6r7AkS

— MDP Secretariat (@MDPSecretariat) September 11, 2021

އެމްޑީޕީގެ ޤައުމީ މަޖިލީހުގެ އިންތިޚާބުގައި 730 ކެނޑިޑޭޓުން ވާދަކުރަށްވާއިރު، މި އިންތިޚާބުގައި ވޯޓުލުމަށް 300 ވޯޓުފޮށި ރާއްޖޭގެ އެކި ސަރަޙައްދުތަކުގައި ބަހައްޓާނެއެވެ. އެޕާޓީން މިހާރުދަނީ އިންތިޚާބުގެ ކަންތައްތައް ބެލެހެއްޓުމަށް އޮފިޝަލުން ހޯދުމުގެ މަސައްކަތް ކުރަމުންނެވެ.

މިހާރު ވެރިކަންކުރާ ކޯލިޝަންގެ މައިޕާޓީ، އެމްޑީޕީއަކީ މިހާރު މެންބަރުން އެންމެ ގިނަ ޕާޓީއެވެ. ރައްޔިތުންގެ މަޖިލީހުގެ ސުޕަ މެޖޯރިޓީވެސް ލިބިފައި ވަނީ އެމްޑީޕީއަށެވެ. އެންމެ ފަހުން ބޭއްވި ރައްޔިތުންގެ މަޖިލީހުގެ އިންތިޚާބުގައި އެޕާޓީން ހޯދާފައިވާ ކާމިޔާބަކީ ރާއްޖޭގެ ބަރުލަމާނީ ހަޔާތުގައި މިހާތަނަށް ޕާޓީއަކުން ހޯދާފައި ނުވާފަދަ ބޮޑު ކާމިޔާބީއެއްކަން ފާހަގަކޮށްލެވެއެވެ.

މިއާއެކު މަޖިލީހުގެ ރައީސާއި ނާއިބްރައީސާއި މަޖިލީހުގެ ގިނަ ކޮމިޓީތަކުގެ މުގައްރިރުކަން ކުރަނީވެސް އެޕާޓީގެ މެންބަރުންނެވެ. މީގެއިތުރުން ޖުޑިޝަލް ސާވިސް ކޮމިޝަން، ޖޭއެސްސީއާއި ގިނަ މިނިވަން މުއައްސަސާތަކުގައި ވެސް ތަމްސީލް ކުރަނީ އެމްޑީޕީގެ މެންބަރުންނެވެ.