ފިޔަވަތީގައި ތިބި ކުދިންނަށް އިތުރަށް އޯގާތެރިކަން ދިނުމަށް ކުރީގެ އިސްލާމިކް މިނިސްޓަރ ޑރ. މުޙައްމަދު ޝަހީމް ޢަލީ ސަޢީދު ގޮވާލައްވައިފިއެވެ.

ހުޅުމާލޭ ކުޑަކުދިންގެ ހިޔާ "ފިޔަވަތީ" ގައި ދިރިއުޅޭ ކުދިން، އެތަނުގެ ބައެއް ކަންތައްތަކާމެދު ހިތްހަމަނުޖެހި، އިއްޔެ ވަނީ ފިޔަވަތި ޢިމާރާތަށް ގެއްލުން ތަކެއްދީ އެތަނުގައި ރޯކޮށްލާފައެވެ. އެކަމާގުޅިގެން ޑރ. ޝަހީމް ވިދާޅުވީ، ފިޔަވަތީގައި އުފެދިގެން އުޅޭ މައްސަލަ މުޖުތަމަޢަށް އެނގުމަކީ މުހިންމުކަމެއް ކަމަށެވެ. އަދި ކުދިންނަށް ދިމާވެފައިވާ މައްސަލަތައް ވީހާވެސް އަވަހަށް ޙައްލު ކުރުމަށް ޑރ. ޝަހީމް ވަނީ ގޮވާލައްވާފައެވެ.

އޭގެ އިތުރުން ޑރ. ޝަހީމް ވަނީ، "ފިޔަވަތީގައި ތިބި ކުދިންނަށް އިތުރު އޯގާތެރިކަން ދިނުމަށް" ދަޢުލަތުގެ ކަމާ ގުޅުންހުރި އިދާރާތަކަށް ގޮވާލައްވާފައެވެ.

ހުޅުމާލޭ ފިޔަވަތީގައި ދިރިއުޅޭ ކުދިންގެ ހިތްހަމަނުޖެހުންތައް ޢާއްމުންނާ ހަމައަށް ތިލަވެފައިވާއިރު، މިކަންތައްތަކާ ގުޅިގެން މަޖިލީހުގެ ޖެންޑާ ކޮމިޓީން ވަނީ ހޯމަ ދުވަހު ބާއްވާ އެ ކޮމިޓީގެ ޖަލްސާއަށް ކަމާބެހޭ އިދާރާތައް ހާޒިރުކޮށް މިކަމުގެ ކަންކަން ސާފުކުރުމަށް ނިންމާފައެވެ. މިބައްދަލުވުމަށް ޖެންޑާ މިނިސްޓްރީއާއި، އެޗްއާރުސީއެމާއި، ޗިލްޑްރަން އޮމްބަޑްސްޕާސަން އެ ކޮމިޓީއަށް ހާޒިރުކޮށް މަޝްވަރާ ކުރުމަށް ވަނީ ހަމަޖެހިފައެވެ.

ކުދިން ބަލައި އަޅާލާނެ ބެލެނިވެރިން ނުވަތަ މައިންބަފައިން ނެތް ކުދިންގެ ތެރެއިން ދައުލަތުން ބަލަހައްޓާ އެކި އުމުރުފުރައިގެ ކުދިން ބައިތިއްބައިގެން ބަލަހައްޓާ ފިޔަވަތީގައި ދިރިއުޅޭ ކުދިންގެ ފަރާތުން އަޚްލާޤީ ގިނަ މައްސަލަތަކެއް ފަހަކަށް އައިސް ދަނީ ފެންމަތިވަމުންނެވެ.