ހެއްކާބެހޭ ބިލު މަޖިލީހަށް ހުށައަޅައި، ބިލުގެ ބަހުސް ފަށައިފިއެވެ.

ހެއްކާ ބެހޭ ބިލަކީ 19 ބާބު ހިމެނޭ 150 މާއްދާގެ މައްޗަށް އެކުލެވޭ ބިލެކެވެ. ސަރުކާރުގެ ފަރާތުން މި ބިލު މަޖިލީހަށް ހުށަހެޅުއްވީ، ތިނަދޫ އުތުރު ދާއިރާގެ މެންބަރު އަބްދުލް މުޣުނީ އެވެ.

ހެއްކާބެހޭ ބިލުގައި، އެއްވެސް ޝައްކެއް ނެތް މިންވަރަށް ކަމެއް ސާބިތުވާ ހާލަތުގައި ހެކި ހުށަހެޅުމެއް ނެތި އެކަން ސާބިތު ވާނެ ކަމާއި، އެގޮތަށް ސާބިތު ވާނެ ކަންތައްތަކަކީ ކޮބައިކަން ތަފްސީލު ކޮށްފައި ވެއެވެ. މީގެ އިތުރުން ހެކީގެ ދަރަޖަ ތަކާއި، ހެކި ސާބިތު ކުރުމަށް އެހީވެދޭ ނިސްބަތާއި، ހެކި ބައި ކުރެވޭނެ ގޮތްތައްވެސް ބިލުގައި ވަނީ ބަޔާންކޮށްފައެވެ.

ހަމައެއާއެކު ހެކިބަސް ދޭ މީހާގެ ކިބައިގައި ހުންނަން ޖެހޭ ޝަރުތުތަކާއި، ކުޑަކުދީންގެ ހެކިބަސް ބަލައި ގަނެވޭނެ ގޮތްތަކާއި، ހެކިބަސް ދިނުން ލާޒިމު ކުރެވޭ ހާލަތްތައް ވެސް ބިލުގައި ވެއެވެ.

ރާއްޖޭގައި މިހާރު އަމަލު ކުރަމުންދާ ހެއްކާބެހޭ ގާނޫނަކީ 1976 ވަނަ އަހަރު ފާސްކޮށްފައިވާ ހަތް މާއްދާގެ މައްޗަށް އެކުލެވޭ ގާނޫނެކެވެ. ސަރުކާރުގެ ފަރާތުން މަޖިލީހަށް ހުށައެޅި ހެއްކާބެހޭ އައު ބިލް ފާސްވެއްޖެނަމަ މިހާރު އަމަލު ކުރަމުން އަންނަ ހެއްކާ ބެހޭ ގާނޫނު އުވިގެންދާނެއެވެ.