ސީދާ ގޮތުން ނުވަތަ ނުސީދާ ގޮތުން ބިދޭސީ އަކަށް ވިޔަފާރީގެ މަންފާ ލިބިދިނުމަށް، ހިންގާ ވިޔަފާރިތައް ބާތިލުކުރުމުގެ ބާރު ރެޖިސްޓްރާ އޮފް ކޮމްޕެނީސް އަށް ލިބިދޭ ގޮތަށް އަމިއްލަ ފަރުދުންގެ ވިޔަފާރީގެ ގާނޫނު އިސްލާހުކުރަން ހުށަހަޅައިފިއެވެ.

ސަރުކާރުގެ ފަރާތުން މި ބިލް ހުށަހެޅުއްވީ ކުރެންދޫ ދާއިރާގެ މެމްބަރ ޢަބްދުލްޣަނީ ޢަބްދުލްޙަކީމެވެ. މި ބިލް ހުށަހަޅާފައިވާ މައިގަނޑު މަޤްޞަދަކީ އަމިއްލަ ފަރުދުންގެ ވިޔަފާރި ރަޖިސްޓަރީކޮށްފައިވާ ފަރާތްތަކަށް މިހާރު ދިމާވާ ދަތިތަކަށް ހައްލު ހޯދައިދިނުމަށާއި އެފަދަ ވިޔަފާރިތަކުގެ ހާލަތު ދެނެގަތުމަށް ފަސޭހަވާނެ އިންތިޒާމެއް ހަމަޖެއްސުމުގެ ގޮތުންނެވެ.

މި އިސްލާހު ހުށަހެޅީ، ދިވެހިންގެ ނަމުގައި ސީދާ ގޮތުން ނުވަތަ ނުސީދާ ގޮތުން ބިދޭސީ ފަރާތަކަށް ވިޔަފާރީގެ މަންފާ ލިބިދިނުމަށް، ހިންގާ ވިޔަފާރިތަކުގެ ސަބަބުން އެންމެ ކުދި އަދި މެދު ފަންތީގެ ވިޔަފާރިތަކަށާއި، ދިވެހި ރައްޔިތުންނަށް ލިބޭ އިޤްތިޞާދީ ފުރުސަތުތައް ހަނިވިޔަ ނުދިނުމަށްޓަކައި ފިޔަވަޅު އެޅޭނެ އިންތިޒާމެއް ހަމަޖެއްސުމުގެ ގޮތުންނެވެ.

މީގެއިތުރުން، އަމިއްލަ ފަރުދުންގެ ވިޔަފާރި ރަޖިސްޓަރީ ކުރެވޭ މުއްދަތު 5 އަހަރުން 10 އަހަރަށް ބަދަލުކުރުމަށް ވެސް އިސްލާހުގައިވަނީ ހުށަހަޅާފައެވެ. އަދި މި ބިލުގައި ވިޔަފާރި އެހެން ފަރާތަކަށް ބަދަލުކުރުމުގައި ޢަމަލުކުރާނެ އުސޫލުތައް ވެސް ވަނީ ބަޔާންކޮށްފައެވެ.

އެގޮތުން މި ބިލަށް ބަހުސް ކުރަމުން މެމްބަރުން ވިދާޅުވެފައިވަނީ އަމިއްލަ ވިޔަފާރީގެ ގޮތުގައި 18 ހާސް ވިޔަފާރި މިހާރުވެސް ރަޖިސްޓްރީ ކޮށްފައިވާ ކަމަށާއި، މި ވިޔާފާރި ތަކުގެ ތެރެއިން 60 އިންސައްތައަކީ އަމިއްލަ ފަރުދުންގެ ކުދި އަދި މެދު ފަންތީގެ ވިޔަފާރިތައް ކަމަށެވެ. އެހެން ކަމުން ރާއްޖޭގެ އިޤްތިޞާދުގައި މައިގަނޑު ރޯލެއް އަދާކުރަނީ މި ވިޔަފާރިތައް ކަމަށްވެސް މެމްބަރުންގެ ބަހުސްގައި ވަނީ ފާހަގަކުރައްވާފައެވެ.