އުނގެނުމުގެ ބޭނުމަކީ ހަމައެކަނި ސަނަދު ހޯދުންކަމުގައި ވެގެން ނުވާނެކަމަށް ހަޔަރ އެޑިއުކޭޝަން މިނިސްޓަރ ޑރ. އިބްރާހިމް ހަސަން ވިދާޅުވެއްޖެއެވެ.

ރައްޔިތުންގެ މަޖިލީހުގައި ވާހަކަދައްކަވަމުން މިނިސްޓަރ ޑރ. އިބްރާހިމް ހަސަން ވިދާޅުވީ އުނގެނުމުގެ ބޭނުމަކީ ހަމައެކަނި ސަނަދު ހޯދުން ކަމުގައި ވާނަމަ، ސެޓްފިކެޓަކީ ފައިސާއަށް ގަންނަ އެއްޗަކަށް ވާނެ ކަމަށާއި، ބައެއް ފަހަރު ވަޒީފާގައި ދެމިތިބުމާއި ވަޒީފާގެ ކުރިއެރުން ހޯދަން ސަނަދެއް އޮންނަން ލާޒިމުވާކަމަށެވެ.

މިކަން މިގޮތަށް ފާހަގަކުރަމުން މިނިސްޓަރ ވިދާޅުވީ މާޒީގައި މި ފަދަ ހާލަތްތައް ފެނިފައި އެބަހުރިކަމަށެވެ.

އެގޮތުން މިނިސްޓަރ ވިދާޅުވެފައިވަނީ އުނގެނުމުގެ އެންމެ މުހިންމު މަޤްސަދަކަށް ވާންވާނީ އިތުރު އިލްމު ހޯދުން ކަމަށާއި، އޭގެ ސަބަބުން ތިމާގެ ދިރިއުޅުމަށް ރަނގަޅު ހެޔޮ ބަދަލުތަކެއް އައިސް، މުޖުތަމައިގައި އުޅޭ މީހުންނަށް އެކަމުގެ ސަބަބުން ގިނަ ފައިދާތައް ފޯރުކޮށްދިނުންކަމަށެވެ. އެހެންކަމުން ހަމައެކަނި ސަނަދެއްގެ ބޭނުމުގައި އުނގެނޭ ހިސާބަށް ދިއުމުން ކަންތައްތައް އެ ދިޔައީ ގޯސްވާ ހިސާބަށް ކަމަށާއި އެކަމުން މުޖުތަމައަށް އެއްވެސް މަންފާއެއް ނުކުރާނެކަމަށް މިނިސްޓަރ ވަނީ ފާހަގަކުރައްވާފައެވެ.

މަތީ ތައުލީމުގެ ފެންވަރު ދަށްވަމުންދާ ކަމުގެ ވާހަކަތައް ދެކެވެމުން ދާއިރު، މިދިޔަ އަހަރު އިސްލާހު ކުރި މަތީ ތައުލީމުގެ ގާނޫނުގެ ދަށުން މޯލްޑިވްސް ކޮލިފިކޭޝަންސް އޮތޯރިޓީ އުފައްދަން ވަނީ ބަޔާން ކޮށްފައެވެ. އެގޮތުން މި އޮތޯރިޓީ ވެގެންދާނީ މަތީ ތައުލީމުގެ ފެންވަރު ކަށަވަރުކުރުމަށް ކުރަންޖެހޭ ހުރިހާ މަސައްކަތްތައްކޮށް ސަނަދުތަކުގެ ފެންވަރު ބެލުމުގެ މަސައްކަތްތައް ކުރާ އިދާރާއެކެވެ.