ހުކުމާ އެއްގޮތަށް ރައީސް ޔާމީން ނުދައްކަވާ ފަސް މިލިއަން ޑޮލަރުގެ އަޑުއެހުންތައް ސިވިލްކޯޓުގައި ފެށުމަށް ތައްޔާރުވެއްޖެއެވެ.

ބަންޑާރަނާއިބުގެ އޮފީހުން މިއަދު ބުނީ, މަނީ ލޯންޑްރިންގގެ ޢަމަލެއް ހިންގުމުގެ ކުށް ސާބިތުވެ، އެ ކުށުގެ ޢުޤޫބާތެއްގެ ގޮތުން ކުރީގެ ރައީސް، މއ. ކާމިނީހުޅަނގުގެ، ޢަބްދުﷲ ޔާމީން ޢަބްދުލްޤައްޔޫމް 5 އަހަރު ދުވަހުގެ މުއްދަތަށް ޖަލަށް ލުމާއެކު، ޖޫރިމަނާގެ ގޮތުގައި ދައުލަތަށް ދައްކަން ކަނޑައެޅި ފަސް މިލިއަން ޔޫއެސް ޑޮލަރު ކްރިމިނަލް ކޯޓުގެ ޙުކުމާ އެއްގޮތަށް ދައްކާފައިނުވާތީ، ޙުކުމުގެ އެ ބައި ތަންފީޛްކުރުމަށް ދައުލަތުން ސިވިލް ކޯޓަށް ހުށަހަޅާފައި ވަނީ 24 އޮގަސްޓް 2021 ގައި ކަމަށެވެ.

އެ މައްސަލަ ހުށަހެޅުމުން "ކޯޓުން އިސްނަގައިގެން ޙުކުމް ތަންފީޛު ކުރުމުގައި ޢަމަލުކުރާނެ ގޮތުގެ އުޞޫލު"ގެ ދަށުން ކްރިމިނަލް ކޯޓުގެ އެ ޙުކުމް ތަންފީޒުކުރުމުގެ މައްސަލަ ސިވިލް ކޯޓުން ކުރިއަށް ގެންދާ ކަމަށް ބުނެފައިވާ ކަމަށް ބަންޑާރަނާއިބުގެ އޮފީހުން ވަނީ ބުނެފައެވެ.



ބަންޑާރަނާއިބުގެ އޮފީހުން ބުނީ އެ މައްސަލައިގެ ޙުކުމް ތަންފީޒުކުރުމުގެ ފުރަތަމަ އަޑުއެހުން 06 އޮކްޓޯބަރ 2021 ވަނަ ދުވަހުގެ 11:20 އަށް ތާވަލުކޮށްފައިވާކަން ސިވިލް ކޯޓުން އެއޮފީހަށް އަންގާފައިވާ ކަމަށެވެ.

ރައީސް ޔާމީންގެ ވެރިކަމުގައި ހިންގި އެމްއެމްޕީއާރުސީގެ ހިޔާނާތަކީ މިހާތަނަށް ސަރުކާރަކުން ހިންގި އެންމެބޮޑު ހިޔާނާތް ކަމަށް އޭޖީ އޮފީހުން ވަނީ ބުނެފައެވެ. އެ މައްސަލާގައި ހިމެނޭ، ގއ. ވޮޑަމުލާގެ އިކުއިޒިޝަން ކޯސްޓްގެ ގޮތުގައި ދައުލަތަށް ލިބެންޖެހޭ 1،000،000 ޑޮލަރު ރައީސް ޔާމީންގެ އެކައުންޓަށް ޖަމާކޮށްފައިވާއިރު، އެމްއެމްޕީއާރުސީގެ އިތުރު މައްސަލަތަކެއްގެ ތަހުގީގުތައް މިހާރުވެސް ދަަނީ ކުރިއަށެވެ.