ހިޔާ ފްލެޓުގައި ދިރިއުޅޭ ހާއްސަ އެހީއަށް ބޭނުންވާ ކުއްޖަކު، ބުރަކަށި މައްޗަށް ލައިގެން ހުޅުމާލޭގެ ފުރަތަމަ ފިޔަވަހިން ފެށިގެން ހިޔާ ފްލެޓްތަކާއި ހަމައަށް ދިޔަ މަންމައަށް ޖެންޑާ މިނިސްޓްރީގެ މުވައްޒަފަކު ފުރައްސާރަ ކުރި މައްސަލާގައި އެ މިނިސްޓްރީން މާފަށް އެދިއްޖެއެވެ.

ތ. ވޭމަންޑޫގައި ހުންނަ ޖެންޑާ މިނިސްޓްރީގެ އިސް މުވައްޒަފަކު އެ ދެ މައިންނަށް ފުރައްސާރަކޮށް ފޭސްބުކްގައި ކުރި ކޮމެންޓެއްގައި ބުނީ އެޕާޓްމަންޓްދީ، ސްކޫލަށް ދާން ބަސްދީ، ކާނެ ކާއެއްޗެހިދީ، ފެން ބިލް ދައްކައިދިނުމަކީ ދުނިޔޭގެ އެއްވެސް ޤައުމެއްގައި ކުރާކަމެއްކަން އެނގިފައި ނުވާކަމަށެވެ. އަދި އެފަދަ ޤައުމެއް އޮތްތޯ އޭނާ ސުވާލު އުފައްދާފައިވެއެވެ.

އެކަމާ ގުޅިގެން ޖެންޑާ މިނިސްޓްރީން ބުނީ, މިނިސްޓްރީގެ މުވައްޒަފެއްގެ ފަރާތުން މީސް މީޑިޔާގައި ކޮށްފައިވާ ޕޯސްޓެއް މިނިސްޓްރީގެ ސަމާލުކަމަށް އައިސްފައިވާ ކަމަށާއި އެ މުވައްޒަފުގެ ކޮމެންޓުގައިވަނީ މިނިސްޓްރީން ދެކޭ ގޮތް ނޫން ކަމަށެވެ. އަދި އެކަމަށްޓަކައި މާފަށް އެދޭކަމަށާއި, ކުރިއަށް އޮތްތަނުގައި އެފަދަކަމެއް ތަކުރާރު ވިޔަ ނުދިނުމަށް ކުރަންޖެހޭ ކަންކަން ކުރާނެ ކަމަށް ޖެންޑަރ މިނިސްޓްރީން ވަނީ ބުނެފައެވެ.

ހުޅުމާލޭ ދެވަނަ ފިޔަވައްސަށް ބަހުގެ ޚިދުމަތް ނުލިބޭތީ ޢާއްމުންގެ ކަންބޮޑުވުން އިތުރުވެފައި ވަނިކޮށް އިއްޔެއިން ފެށިގެން ދެވަނަ ފިޔަވައްސަށް ބަހުގެ ޚިދުމަތް ދޭން ވަނީ ފަށާފައެވެ.

ހިޔާ ފްލެޓްތަކަށް ބަހުގެ ހިދުމަތް ދެނީ ކޮންމެ ދުވަހެއްގެ ހެނދުނު 5:45 އިން ރޭގަނޑު 11:45 އަށެވެ. އެކަމަކު ހުކުރު ދުވަހު ހެނދުނު 11:45 އިން މެންދުރުފަހު 1:45 އަށް ހިޔާ ފްލެޓްތަކަށް ބަހުގެ ހިދުމަތް މެދުކަނޑާލަ އެވެ.