ހުޅުމާލެ ދެވަނަފިޔަވައްސަށް ބުރަކަށިމަތީގައި ދަރިފުޅު އުފުލި މަންމައަށް ލިޓަސްއިން ސައިކަލެއް ހަދިޔާކޮށްފިއެވެ.

ލިޓަސްއިން މިއަދު ބުނީ ގިނަ ބައެއްގެ އެހީތެރިކަމާއިއެކީ، ކޮނޑުމަތީ ދަރިފުޅު އުފުލި އެމަންމައާ ގުޅޭނެ ގޮތް މެދުވެރިވެ، ލިޓަސްގެ ހަދިޔާ މިހާރު ރައްދު ކޮށްފައިވާ ކަމަށެވެ. އަދި ހަދިޔާ ކުރި ސައިކަލް 2 އަހަރު ދުވަހު ހިލޭ ސާވިސް ކޮށްދިނުމުގެ އިތުރުން، 2 އަހަރު ދުވަހު ދުއްވުމަށް ބޭނުންވާނެ ޕެޓްރޯލް ޚަރަދުވެސް ދޭނެކަމަށް ލިޓަސްއިން ވަނީ ބުނެފައެވެ.

ހިޔާ ފްލެޓުގައި ދިރިއުޅޭ ހާއްސަ އެހީއަށް ބޭނުންވާ ކުއްޖަކު، ބުރަކަށި މައްޗަށް ލައިގެން ހުޅުމާލޭގެ ފުރަތަމަ ފިޔަވަހިން ފެށިގެން ހިޔާ ފްލެޓްތަކާއި ހަމައަށް ދިޔަ މަންމައަށް ޖެންޑާ މިނިސްޓްރީގެ މުވައްޒަފަކު ފުރައްސާރަ ކުރި މައްސަލާގައި އެ މިނިސްޓްރީން ވަނީ މާފަށް އެދިފައެވެ.

ހުޅުމާލޭ ދެވަނަ ފިޔަވައްސަށް ބަހުގެ ޚިދުމަތް ނުލިބޭތީ ޢާއްމުންގެ ކަންބޮޑުވުން އިތުރުވެފައި ވަނިކޮށް އިއްޔެއިން ފެށިގެން ދެވަނަ ފިޔަވައްސަށް ބަހުގެ ޚިދުމަތް ދޭން ވަނީ ފަށާފައެވެ.

ހިޔާ ފްލެޓްތަކަށް ބަހުގެ ހިދުމަތް ދެނީ ކޮންމެ ދުވަހެއްގެ ހެނދުނު 5:45 އިން ރޭގަނޑު 11:45 އަށެވެ. އެކަމަކު ހުކުރު ދުވަހު ހެނދުނު 11:45 އިން މެންދުރުފަހު 1:45 އަށް ހިޔާ ފްލެޓްތަކަށް ބަހުގެ ހިދުމަތް މެދުކަނޑާލަ އެވެ.