ކޮވިޑް-19ގެ ސަބަބުން ބަންދުކޮށްފައިވާ އިންޑިއާ، ގިނަ ދުވަސްތަކަކަށް ފަހު މި މަހުގެ 15 ވަނަ ދުވަހު ފަތުރުވެރިންނަށް ހުޅުވާލުމަށް ހަމަޖެހިފައިވާކަމަށް އިންޑިއާ ސަރުކާރުން ބުނެފިއެވެ.

މިކަމާ ގުޅިގެން އިންޑިއާގެ ހޯމް މިނިސްޓްރީން ނެރެފައިވާ ބަޔާނުގައި ބުނެފައިވަނީ ގިނަ ކަންކަމަށް ބެލުމަށްފަހު ޗާޓަރ ފްލައިޓްތަކުގައި އަންނަ ފަރާތްތަކަށް ޓުއަރިސްޓް ވިސާ ދޫކުރުމަށް ހަމަޖެހިފައިވާކަމަށެވެ. އެގޮތުން އޮކްޓޯބަރ މަހުގެ 15 ވަނަ ދުވަހުން ފެށިގެން ޗާޓަރ ފްލައިޓްގައި އަންނަ ފަރާތްތަކަށް އެފުރުސަތު ހުޅުވިގެންދާނެކަމަށް ވަނީ ބުނެފައެވެ.

އާންމު ފްލައިޓްތަކުގައި އިންޑިޔާއަށް އެތެރެވާ ފަތުރުވެރިންނަށް އެގައުމަށް އެތެރެވެވޭނީ ނޮވެމްބަރ މަހުގެ 15 ވަނަ ދުވަހުން ފެށިގެން ކަމަށްވެސް ހޯމް މިނިސްޓްރީގެ ބަޔާނުގައި ބުނެފައިވެއެވެ.

ކޮވިޑް-19 ހަލުވި ކަމާއެކީ އެގައުމުގެ ފެތުރެމުން ދާތީ ބަލި ކޮންޓްރޯލް ކުރުމުގެ ގޮތުން މިދިއަ އަހަރުގެ މާޗް މަހު އިންޑިއާ އިން ވަނީ އެހެން ގައުމުތަކުން އެގައުމަށް އެތެރެވާ މީހުންނަށް ވިސާ ދޫކުރުން މެދުކަނޑާލާފައެވެ.

ނަމަވެސް ބައެއް ކެޓަގަރީތަކަށް ނިސްބަތްވާ މީހުންނާއި ޑިޕްލޮމެޓުންނާއި ވިޔަފާރިވެރިންނަށް އޭގެފަހުން އެގައުމަށް އެތެރެވުމުގެ ހުއްދަ ވަނީ ދީފައެވެ.

އެގޮތުން، އިންޑިއާ ސަރުކާރުން މި ނިންމުން ނިންމާފައިވަނީ އިންޑިއާގައި މިހާރު ކޮވިޑްގެ ހާލަތު އާންމު ހާލަތަށް ރުޖޫއަވެފައިވާތީއެވެ.