ރައްޔިތުންގެ މަޖިލީހުގެ ރައީސް މުހައްމަދު ނަޝީދު 4 މަސް ފަހުން މިއަދު މާލެ ވަޑައިގަންނަވާއިރު އެއަރޕޯޓުން އެމަނިކުފާނަށް މަރުހަބާ ދަންނަވާނީ ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙް ކަމަށް މަޢުލޫމާތު ލިބިއްޖެއެވެ.

ރައީސް ނަޝީދު މިއަދު ރާއްޖެ ވަޑައިގަތުމަށް ހަމަޖެހިފައިވަނީ މެންދުރުފަހު 2:50 ގައެވެ. އެމަނިކުފާނުގެ އަރިހުގައި ދުބާއީގައި މިހާރު ކުރިއަށްދާ އެކްސްޕޯއަށް ވަޑައިގެންއުޅުއްވާ އެމްޑީޕީގެ އިސް ބޭފުޅުންވެސް މާލެ ވަޑައިގަންނަވާނެއެވެ. ރައީސް ނަޝީދު މާލެ ވަޑައިގަންނަވާނީ ތިން ދުވަހަށެވެ. މިއީ ސިޔާސީގޮތުން މިހާރު ޚިޔާލުތަފާތު ވެފައިވާ ރައީސް ނަޝީދާއި ރައީސް ޞާލިޙް ދިގު މުއްދަތަކަށްފަހު އެއްތަނަކުން ބައްދަލުވާ ފުރަތަމަ ފަހަރެވެ.

އިނގިރޭސިވިލާތުގައި ހުންނެވުމަށްފަހު ރައީސް ނަޝީދު ދުބާއީއަށް ވަޑައިގަތީ އެޤައުމުގައި އޮތް އެކްސްޕޯ 2020 އަށެވެ. އަދި އިނގިރޭސިވިލާތަށް އެމަނިކުފާނު ވަޑައިގަތީ މޭމަހުގެ 6 ވަނަ ދުވަހު ދިން ބޮމުގެ ހަމަލާއަށް ޖަރުމަނުން ފަރުވާ ހޯއްދެވުމަށްފަހުއެވެ.

4 މަހަށްފަހު ރައީސް ނަޝީދު މިއަދު މާލެ ވަޑައިގަންނަވަން ހަމަޖެހިފައިވާއިރު، އެމަނިކުފާނުގެ ސެކިއުރިޓީ ކަންކަމާއިމެދު އެމަނިކުފާނުގެ އަރިސް ބޭފުޅުން ގެންދަވަނީ ކަންބޮޑުވުން ފާޅުކުރަމުންނެވެ. އަދި ރައީސް ނަޝީދު ވެސް ވަނީ އެމަނިކުފާނުގެ ސަލާމަތީ ކަންކަމާމެދު ސުވާލު އުފައްދަވާފައެވެ.

ރައީސް ނަޝީދު މިއަދު މާލެ ވަޑައިގަންނަވާއިރު އެމަނިކުފާނު ހުންނެވުމަށް ދަޢުލަތުން ހަމަޖައްސަވާފައިވާ މ. މުރައިދޫގެ މަރާމާތުކޮށް އަދި ނިމިފައެއް ނުވެއެވެ.