ތިން ދުވަހުގެ ދަތުރުފުޅެއްގައި ރަައީީސް ނަޝީދު ރާއްޖެ ވަޑައިގެންފިއެވެ.

ރައްޔިތުންގެ މަޖިލީހުގެ ރައީސް, ރައީސް މުހައްމަދު ނަޝީދު 4 މަސް ފަހުން މިއަދު މާލެ ވަޑައިގަންނަވާފައިވާއިރު އެއަރޕޯޓުން އެމަނިކުފާނަށް މަރުހަބާ ދެންނެވީ ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙެވެ. އޭގެ އިތުރުން ރައްޔިތުންގެ މަޖިލީހުގެ ނާއިބުރައީސް އީވާ ޢަބްދުالله ވެސް ވަނީ އެއަރޕޯޓުން އެމަނިކުފާނަށް މަރުޙަބާ ވިދާޅުވެފައެވެ.

ރައީސް ނަޝީދު މިއަދު ރާއްޖެ ވަޑައިގަތީ މެންދުރުފަހު 2:50 ގައެވެ. އެމަނިކުފާނުގެ އަރިހުގައި ދުބާއީގައި މިހާރު ކުރިއަށްދާ އެކްސްޕޯއަށް ވަޑައިގެންއުޅުއްވާ އެމްޑީޕީގެ އިސް ބޭފުޅުންވެސް ވަނީ މާލެ ވަޑައިގަންނަވާފައެވެ. ރައީސް ނަޝީދު މާލެ ވަޑައިގެންނެވީ ތިން ދުވަހަށް ކަމަށް މަޢުލޫމާތު ލިބިފައިވެއެވެ.

އިނގިރޭސިވިލާތަށް ރައީސް ނަޝީދު ވަޑައިގަތީ މޭމަހުގެ 6 ވަނަ ދުވަހު އެމަނިކުފާނު އަވަހާރަކޮށްލުމަށް ދިން ބޮމުގެ ހަމަލާގައި ލިބިވަޑައިގެންނެވި ޒަޚަމްތަކަށް ޖަރުމަނުން ފަރުވާ ހޯއްދެވުމަށްފަހުއެވެ. އިނގިރޭސިވިލާތުގައި ހުންނެވުމަށްފަހު ދުބާއީގައި އޮތް އެކްސްޕޯ 2020 ގައި ބައިވެރިވެވަޑައިގަތުމަށް ރައީސް ނަޝީދު ދުބާއީއަށް ވަޑައިގެންނެވިއެވެ. އެމަނިކުފާނު ރާއްޖެ ވަޑައިގަތީ އެ ދަތުރުފުޅަށްފަހު ދުބާއީންނެވެ.



4 މަހަށްފަހު ރައީސް ނަޝީދު މިއަދު މާލެ ވަޑައިގެންފައިވާއިރު، އެމަނިކުފާނުގެ ސެކިއުރިޓީ ކަންކަމާއިމެދު އެމަނިކުފާނުގެ އަރިސް ބޭފުޅުން ގެންދަވަނީ ކަންބޮޑުވުން ފާޅުކުރަމުންނެވެ. އަދި ރައީސް ނަޝީދު ވެސް ވަނީ އެމަނިކުފާނުގެ ސަލާމަތީ ކަންކަމާމެދު ސުވާލު އުފައްދަވާފައެވެ.

ރައީސް ނަޝީދު މިއަދު މާލެ ވަޑައިގެންނެވިރު އެމަނިކުފާނު ހުންނެވުމަށް ދަޢުލަތުން ހަމަޖައްސަވާފައިވާ މ. މުރައިދޫގެ މަރާމާތުކޮށް އަދި ނިމިފައެއް ނުވެއެވެ.