އެމްޑީީޕީގެ އެތެރޭގެ އިންތިޚާބު ގައި އިނގުރައިދޫ ދާއިރާގެ ވޯޓު އަލުން ނެގުމަށް ނިންމާފައި ވާކަމަށް އެޕާޓީން ހާމަކޮށްފިއެވެ.

އެމްޑީޕީން ބުނީ އެމްޑީޕީގެ ދާއިރާތަކުގެ އިންތިޚާބު 2021 ގެ ރ. އިނގުރައިދޫ ދާއިރާގެ ވޯޓާއި ގުޅޭ ޝަކުވާތައް، ޝަކުވާ ހުށަހަޅާ ކޮމިޓީން ބެލުމަށްފަހު ދީފައިވާ ލަފައަށް އިންތިޚާބާ ބެހޭ ކޮމިޓީން ރިއާޔަތް ކުރުމަށްފަހު އެ ދާއިރާގެ ވޯޓު އަލުން ނެގުމަށް އިންތިޚާބާ ބެހޭ ކޮމިޓީން ނިންމާފައިވާ ކަމަށެވެ.

އަދި އެވޯޓުލުން އޮންނާނީ، 23 އޮކްޓޯބަރ 2021 ވާ ހޮނިހިރު ދުވަހު ހެނދުނު 9.00 ން ހަވީރު 5.00 އަށް ކަމަށާއި, އެގޮތުން ވޯޓުލުން އޮންނާނީ، ރ. އިނގުރައިދޫ ދާއިރާގެ ފައިނު، އިނގުރައިދޫ، އިންނަމާދޫ، ކިނޮޅަސް އަދި ރަސްމާދޫ ސްކޫލް ގައި ކަމަށް އެމްޑީޕީން ވަނީ ބުނެފައެވެ.

މީގެ އިތުރުން، ކޮވިޑްގެ ހާލަތާ ގުޅިގެން 25 ސެޕްޓެމްބަރ 2021 ގައި ވޯޓުލުން ކުރިއަށް ނުގެންދެވުނު ތ. ގުރައިދޫ ދާއިރާގެ ދިޔަމިގިލީގައިވެސް 23 އޮކްޓޯބަރ 2021 ވާ ހޮނިހިރު ދުވަހުގެ ހެނދުނު 9.00 ން ހަވީރު 5.00 އަށް އެރަށު ސްކޫލްގައި ވޯޓުލުން ކުރިއަށް ދާނެއެވެ.

އިނގުރައިދޫ ދާއިރާ އަދި ތ. ގުރައިދޫ ދާއިރާގެ ދިޔަމިގިލީގެ ވޯޓުލުން މާލޭގައި ކުރިއަށް ގެންދިއުމަށް ހަމަޖެހިފައި ވަނީ އެމް.ޑީ.ޕީގެ މައި ހަރުގޭގައި ކަމަށާއި, އަދި މާލޭގައި ބަހައްޓާ ތ. ގުރައިދޫ ދާއިރާގެ ވޯޓު ފޮށްޓަކީ ހަމައެކަނި އެދާއިރާގައި ހިމެނޭ ދިޔަމިގިލީގެ އެމް.ޑީ.ޕީ މެންބަރުންނަށް ވޯޓު ލުމަށް ބަހައްޓާ ފޮށްޓެއް ކަމަށްވެސް އެޕާޓީން ވަނީ ބުނެފައެވެ.

700 އަށްވުރެ ގިނަ ކެންޑިޑޭޓުން ވާދަ ކުރި އެމްޑީޕީގެ އެތެރޭގެ އިންތިޚާބުގައި 455 މަޤާމަކަށް މެންބަރުން އިންތިޚާބު ކޮށްފައިވެއެވެ.