އުންސުރު ހަމަނުވެގެން ދަޢުވާ ނުކުރަން ނިންމައި ޕީޖީ އޮފީހުން އޭސީސީއަށް އަނބުރާ ފޮނުވާލާފައިވާ ވެންޓިލޭޓަރ މައްސަލައިގައި ދައުވާކުރަން ދެވަނަ ފަހަރަށް ފޮނުވުމާ މެދު މިމަހުގެ ތެރޭގައި ގޮތެއް ނިންމާނެ ކަމަށް އެންޓިކޮރަޕްޝަން ކޮމިޝަން (އޭސީސީ) އިން ހާމަކޮށްފިއެވެ.

ރައްޔިތުންގެ މަޖިލީހުގެ މިނިވަން މުއައްސަސާތަކުގެ ކޮމިޓީގެ ބައްދަލުވުމުގައި އޭސީސީގެ ރައީސް މަރިޔަމް ޝިއުނާ ވިދާޅުވީ، ވެންޓިލޭޓަރުތަކުގެ މައްސަލައިގެ ތަގުގީގަށް ނަގަންޖެހޭ ހުރިހާ ބަޔާންތަކެއް މިހާރު ނަގައި ނިންމާފައިވާ ކަމަށާއި މި މަސް ނިމުމުގެ ކުރިން އެ މައްސަލައިގައި ދައުވާކުރަން ދެވަނަ ފަހަރަށް ފޮނުވުމާ މެދު ގޮތެއް ނިމިގެންދާނެ ކަމަށެވެ.

ވެންޓިލޭޓަރު ޚިޔާނާތާ ގުޅިގެން އޭސީސީން ބަލަމުންދާ ކަންތައްތަކުގެ ތެރޭގައި، ދައުލަތަށް ގެއްލުންވާ ގޮތަށް އެގްރީމަންޓް ހެދި މައްސަލައާއި، ފައިނޭންޝަލް ނުވަތަ ފައިސާގެ މުއާމަލާތުގެ އިތުރު ތަހުގީގްތަކެއް ހިމެނެއެވެ. މިމަސައްކަތް މިހާރު ނިމުމަކާއި ގާތަށް ގޮސްފައިވާއިރު، މައްސަލައިގައި އޭސީސީން ދައުވާ ކުރަން ފޮނުވުމާމެދު މިމަސް ނިމުމުގެ ކުރިން ގޮތެއް ނިންމާނެ ކަމަށް ޝިއުނާ ވަނީ ވިދާޅުވެފައެވެ. މިމައްސަލައިގައި ވެންޓިލޭޓަރުތައް ހޯދުމަށް ދުބާއީގެ އެގްޒެކިއުޓާސްއާއެކު ހެދި އެއްބަސްވުން ބާޠިލުކޮށް އާބިޓްރޭޝަން މެދުވެރިކޮށް ފައިސާހޯދަން ސަރުކާރުން މިހާރު ވަނީ ނިންމާފައެވެ. ނަމަވެސް އެކަން ކުރިއަށް ދަނީ ކޮން ގޮތަކަށް ކިހާވަރަކަށް ކަމެއް ނޭނގެއެވެ.

ވެންޓިލޭޓަރުތަކުގެ ކޮރަޕްޝަންގެ މައްސަލައިގައި ދައުވާކުރުމަށް އޭސީސީން ދެފަހަރެއްގެ މަތިން ޕްރޮސެކިއުޓަރ ޖެނެރަލްގެ އޮފީހަށް ފޮނުވުމުންވެސް ޕީޖީން ވަނީ ދަޢުވާކުރެވޭވަރަށް ހެކި ނެތްކަމަށްބުނެ އެމައްސަލަ އަނބުރައި ފޮނުވާލާފައެވެ.

މިކަމުގައި ގިނަބައެއްގެ ކަންބޮޑުވުމާއި ޝަކުވާތައް ފެންމަތިވުމުން ޕީޖީ ޝަމީމު ދެއްކެވީ އުންސުރުތަކެއް ފުރިހަމަ ނުވާތީ ދަޢުވާ ނުކުރެވޭ ކަމުގެ ބަހަނާއެވެ. މިމައްސަލައިގައި ޕީޖީ އިސްތިއުފާ ދެއްވުމަށް ރައްޔިތުން މަޖިލީހުގެ ރައީސް، ރައީސް މުޙައްމަދު ނަޝީދު ވަނީ ގޮވާލައްވާފައެވެ. ނަމަވެސް ޕީޖީ ޝަމީމަކަށް އެކަން ކުރަށްވާކަށް ކެރިވަޑައެއް ނުގެންނެވިއެވެ.

ދުބާއީގެ އެގްޒެކިއުޓާރސް ޖެނެރަލް ޓްރޭޑިންއަކީ، ވެންޓިލޭޓަރު ގެންނަން ހަވާލުކުރި ތިން ކުންފުނީގެ ތެރެއިން ސަރުކާރުން އެޑްވާންސްކޮށް ފައިސާ ދޫކުރި ހަމައެކަނި ކުންފުންޏެވެ. އެމީހުން ރާއްޖެއަށް ވެންޓިލޭޓަރެއް ފޯރުކޮށްދޭނެ އަގެއް ކަމަށް ބުނެފައިވަނީ، 32،500 ޑޮލަރަށެވެ.

މިދިޔަ އަހަރުގެ އޭޕްރީލް މަހުގެ ދެވަނަ ދުވަހު، 34 މިލިއަން ރުފިޔާއަށް ވެންޓިލޭޓަރުތައް ގެނައުމުގެ އެގްރީމަންޓްގައި ސޮއިކޮށްފައިވާއިރު، އެޑްވާންސަށް 30.9 މިލިއަން ރުފިޔާވެސް އެގްޒެކިއުޓާރސް ޖެނެރަލް ޓްރޭޑިންއަށް ވަނީ ދައްކާފައެވެ. އެގްރީމަންޓްގައި 14 ދުވަހުގެ ތެރޭގައި ވެންޓިލޭޓަރުތައް ރާއްޖެ ގެނެވޭނެ ކަމަށް ބުނެފައިވާއިރު، މިހާތަނަށް ރާއްޖެއަށް ލިބިފައި ވަނީ އެންމެ 15 ވެންޓިލޭޓަރެވެ. އަދި ސަރުކާރުން މަސައްކަތް ކޮށްގެން ވެސް ބާކީ 65 ވެންޓިލޭޓަރު ލިބިފައެއް ނުވެއެވެ.