ގިނަ ބައެއްގެ މެދުގައި މިހާރު އެންމެ ފޯރީގަ ދެކެވެމުން އަންނަނީ ކޮޕް26 ސަމިޓުގެ ވާހަކައެވެ. މިއީ 1995 ވަނަ އަހަރުން ފެށިގެން ކޮންމެ އަހަރަކުވެސް އދ. އިން ބާއްވަމުން އަންނަ ކޮންފަރެންސެކެވެ. މި ކޮންފަރެންސަކީ ތިމާވެއްޓަށާއި މޫސުމަށް އަންނަ ބަދަލުކުތަކާ ގުޅޭގޮތުން ދުނިޔޭގެ އެކި ކަންކޮޅުތަކުން އެކި ފަންތީގެ މީހުން އެއްވެގެން ކުރިއަށް ގެންދާ އެންމެ މުހިންމު އަދި އެންމެ ބޮޑު ތިމާވެއްޓާބެހޭ ކޮންފެރެންސެވެ.

އދގެ މެމްބަރު ހުރިހާ ގައުމަކުންވެސް ސޮއިކޮށްފައިވާ ޔުނައިޓެޑް ނޭޝަންސް ފްރޭމްވޯރކް ކޮންވެންޝަން އޮން ކްލައިމެޓް ޗޭންޖްގެ ދަށުން ބާއްވާ މި ކޮންފަރެންސަކީ ބައެއް ގައުމުތަކުގެ އެންމެ އިސް ލީޑަރުންނާއި، އަނެއްބައި ގައުމުތަކުގެ މިނިސްޓަރުންނާއި، ތިމާވެށި ހިމާޔަތްކުރުމަށް ވަކާލާތުކުރާ މީހުންނާއި، މިކަމަށް ޝައުގުވެރިކަން ހުންނަ ސައިންސްވެރިން ކޮންމެ އަހަރަކު އެއްވެ ކުރާ ވަރަށް މުހިންމު ސައްލާއެކެވެ.

އެހެންކަމުން "ކޮޕް" އަކީ ކީއްކުރާ ކިހާ މުހިންމު އަދި ކޮން ބޭނުމެއްގައި ކޮން ކަމެއް ހާސިލުކުރަން ކުރާ ކަމެއްތޯ ވެސް އެނގެން މުހިންމެވެ. "ކޮޕް" މި ބަހުގެ ދިގު ގޮތަކީ "ކޮންފަރެންސް އޮފް ދަ ޕާޓީސް" އެވެ. މިއީ ޔުނައިޓެޑް ނޭޝަންސްގެ ކްލައިމެޓް ޗޭންޖާއި ގުޅޭ ފްރޭމްވޯރކް ކޮންވެންޝަންގައި ސޮއިކޮށްފައިވާ 197 ގައުމަކުން ބައިވެރިވާ ކޮންފަރެންސެކެވެ. އެބުނާ ޕާޓީއަކީ އެގައުމުތަކެވެ.

ކޮޕް ގެ ފަހަތަށް އަންނަ ނަންބަރަކީ މި ކޮންފަރެންސް ބޭއްވޭ ފަހަރުގެ އަދަދެވެ. ނުވަތަ އެއީ ކިތައްވަނަ ބައްދަލުވުންކަން އަންގައިދޭ ނަންބަރެވެ. އެހެންކަމުން މި އަހަރު މި ބާއްވަނީ ކޮޕްގެ 26 ވަނަ ކޮންފަރެންސެވެ. މި ކޮންވެކްޝަންގެ ދަށުން އެންމެ ފުރަތަމަ ކޮންފަރެންސް ބާއްވާފައިވަނީ 1995 ވަނަ އަހަރު ބަރލިންގައެވެ. އެއަށްފަހު މެދު ނުކެނޑި ކޮންމެ އަހަރަކު މި ކޮންފަރެންސް އަންނަނީ ބާއްވަމުންނެވެ.

މި ކޮންފަރެންސްގެ ބޭނުމަކީ މި 197 ގައުމުގެ ސިޔާސަތު ކަނޑައަޅާ ވެރިން އެއްތަންވެގެން މޫސުމަށް އަންނަ ބަދަލުތަކާ ގުޅިގެން ދުނިޔެއާއި ދުނިޔޭގެ ގައުމުތަކަށް ކުރިމަތިވާ މޫސުމީ ބަދަލުތަކާއި ގެއްލުންތަކާއި އަދި ގޮންޖެހުންތަކާއި އަދި އެ ކަންކަމުން އަރައިގަތުމަށް ގައުމުތަކުން ކުރަމުން އަންނަ މަސައްކަތްތަކާއި ގުޅޭގޮތުން މަޝްވަރާކުރުމެވެ. އެގޮތުން މި މައްސަލައަށް ހައްލު ހޯދުމަށް އިތުރަށް ދިރާސާކޮށް ދެން ކުރަންވީ ކަންކަމާއި ގުޅޭގޮތުން ހުރިހާ ގައުމެއް ގުޅިގެން އެންމެ ރަނގަޅު އެކަށޭނެ ހައްލުތަކެއް ހޯދުމެވެ.

ކޮޕް26 ބޭއްވުމަށް ހަމަޖެހިފައިވަނީ ނޮވެމްބަރ 31ން ފެށިގެން ނޮވެމްބަރ 12 އާ ހަމައަށެވެ. އަދި މި އަހަރުގެ ކޮންފަރެންސް ބާއްވަން ހަމަޖެހިފައިވަނީ އިނގިރޭސި ވިލާތުގައެވެ. މިއީ ތާރީހުގައިވެސް ޔޫކޭގައި މިކޮންފެރެންސް ބާއްވާ ފުރަތަމަ ފަހަރެވެ. ސްކޮޓްލެންޑްގެ އެންމެ ބޮޑު ސިޓީކަމުގައިވާ ގްލާސްގޯގެ ދެ ސަރަހައްދެއްގައި މި ކޮންފެރެންސް ކުރިއަށް ދާނެއެވެ.

ފުރަތަމަ ހަފްތާގައި މަޝްވަރާކުރުމަށް ހަމަޖެހިފައިވަނީ ޓެކްނިކަލް ކަންކަމާއި ގުޅޭގޮތުންނެވެ. އޭގެތެެރޭގައި ކާބަން ކްރެޑިޓްސް، ތިމާވެށީގެ ގޮތުން ނާޒުކު ގައުމުތަކަށް ދޭ ފަންޑު އަދި މޫސުމީ ބަދަލުތަކަށް ގުދުރަތީ ގޮތުން ގެނެވޭނެ ބަދަލުތަކާއި ގުޅޭގޮތުން ވާހަކަދައްކާ މަޝްވަރާ ކުރަމުން ދާނެއެވެ. ދެ ވަނަ ހަފްތާގައި ކުރިއަށްދާނީ ޖިންސީ ހަމަހަމަކަން، ދަތުރުފަތުރު، މޫސުމީ ބަދަލުތަކަށް ސައިންސްގެ ނަޒަރުން ގެނެވޭނެ ހައްލުތަކާއި ގުޅޭގޮތުން ވާހަކަދެއްކުމެވެ.

މިފަހަރުގެ ކޮޕް26 ކޮންފަރެންސް މުހިންމު ވާ ސަބަބުތައް ވަރަށް ގިނައެވެ. އޭގެ ތެރެއިން އެއް ސަބަބަކީ ދުނިޔެއަށް މިހާރު ކުރިމަތިވަމުންދާ މޫސުމީ ކާރިސާތަކުން ދުނިޔެ ސަލާމަތްކުރުމަށް ވީއެންމެ އަވަހަކަށް ބޮޑެތި ފިޔަވަޅުތަކެއް އަޅަން ޖެހޭކަން ސައިންސްވެރިން ހާމަކޮށްފައިވާތީއެވެ. އެހެންކަމުން މި ކޮންފަރެންސް ވެގެންދާނީ މިފަދަ ފިޔަވަޅުތަކެއް އެޅުމަށް އެންމެ ފަސޭހައިން ދުނިޔޭގެ ހުރިހާ ގައުމުތަކަކަށް އެއްބަސްވެވޭނެ މާހައުލަށެވެ.

އަދި ކޮޕް26 ވެގެންދާނީ ކޮވިޑް-19ގެ ބަލިމަޑުކަމުން އަރައިގަތުމަށާއި، ތިމާވެއްޓާ ރައްޓެހި ގޮތަކަށް އިގްތިޞާދު ބިނާކޮށް، މި ދަތި ދަނޑިވަޅުން ގައުމުތައް އަރައިގަތުމަށް މަގުފަހި ކޮށްދޭ ކޮންފަރެންސަކަށެވެ.

މި ކުޑަކުޑަ ދިވެހިރާއްޖެއަކީ ކޮޕް ސަމިޓްގައި ކުދި ޖަޒީރާ ގައުމުތަކުގެ ހައްގުގައި އިސްވެ ވަކާލާތު ކުރާ އެންމެ "އަޑު ގަދަ" އެއް ގައުމެވެ. ރާއްޖެފަދަ ކުދި ގައުމުތަކުގެ ހައްގުގައި ބޮޑެތި ގައުމުތަކާއި "ޖަދަލު ކުރުމުގައި" ދުނިޔޭގެ ގިނަ ބަޔަކަށް ފާހަގަ ކުރެވިފައިވާ ދިވެހި ގައުމުގެ ވެރިން މިސަމިޓަށް މިހާރު ފުރާވަޑައިގެންފައިވާއިރު މިފަހަރުގެ ސަމިޓުން ވެސް އުއްމީދުތަކެއް ހާސިލުވާނެ ކަމަށް ރާއްޖޭގެ ވެރިން އުއްމީދު ކުރަށްވައެވެ.