މިހާރު ސްކޮޓްލެންޑްގެ ގްލާސްގޯގައި ކުރިއަށްދާ އދގެ ކޮޕް26 ސަމިޓްގައި ބައިވެރިވެވަޑައިނުގެން ތުރުކީގެ ރައީސް ރަޖަބް ތައްޔިބު އުރުދުޣާން އެނބުރި ގައުމަށް ވަޑައިގެންފިއެވެ.

ރޯމްގައި ބޭއްވި ޖީ20 ގެ ސަމިޓްގައި ބައިވެރިވެ ވަޑައިގަތުމަށްފަހު އުރުދުޣާން ވަނީ ކޮޕް ސަމިޓްގައި ވައިވެރިވެ ވަޑައިނުގެން އެނބުރި އިސްތަންބޫލަށް ވަޑައިގެންފައެވެ. އަދި އެ މަނިކުފާނު އެނބުރި ގައުމަށް ވަޑައިގަތީ އަނގާރަ އަދި ބުދަ ދުވަހު ބާއްވާ ކޮޕް26 ސަމިޓްގައި ތަގްރީރު ކުރައްވާން ތާވަލް ކޮށްފައިވަނިކޮށް ކަމަށް މީޑިއާތަކުން ރިޕޯޓްކޮށްފައި ވެއެވެ.

އުރުދުޣާން ވިދާޅުވީ ގްލާސްގޯގައި ބާއްވާ ކޮޕް26 ކްލައިމެޓް ކޮންފަރެންސްގައި ބައިވެރިވެވަޑައި ނުގަތުމަށް ނިންމެވީ، ސަލާމަތީ އިންތިޒާމްތަކާއި ބެހޭގޮތުން ތުރުކީން ކުރި ޑިމާންޑްތައް އިނގިރޭސިވިލާތުން ފުރިހަމަ ކޮށްދީފައިނުވާތީ ކަމަށެވެ.

އިއްޔެއިން ފެށިގެން ދުނިޔޭގެ ގައުމުތަކުގެ އިސްވެރިން ކޮޕް ސަމިޓުގައި ގެންދަވަނީ ތަގްރީރު ކުރައްވަމުންނެވެ. ނަމަވެސް މި ސަމިޓްގެ ނަތީޖާއާއި މެދު ހިތްހަމަޖެހިވަޑައި ނުގެން ބައެއް ގައުމުތަކުގެ ވެރީން ގެންދަވަނީ ވާހަކަ ދައްކަވަމުންނެވެ.