އަފްޣާނިސްތާނުގެ ވެރިރަށް ކާބުލްގެ އަސްކަރީ ހަސްފަތާލުގައި ބޮންތަކެއް ގޮއްވާލައިގެން ދިން ހަމަލާއެއްގައި މަދުވެގެން 19 މީހުން މަރުވެއްޖެއެވެ.

މި ހާދިސާގައި ގާތްގަނޑަކަށް 19 މީހުން މަރުވެފައިވާއިރު، މަދުވެގެން 43 މީހަކަށް ވަނީ ތަފާތު އެކި ޒަޚަމްތައް ލިފައެވެ. އަދި މި ބޮމުގެ ހަމަލާއާއެކު ހަސްފަތާލުގެ ކައިރިން ބަޑީގެ އަޑުފަށްގަނޑު އިވިފައިވާ ކަމަށް މީޑިއާތަކުން ރިޕޯޓްކޮށްފައި ވެއެވެ.

އަފްޣާނިސްތާނުގައި މިހާރު ވެރިކަންކުރާ ތާލިބާން ޖަމާއަތުގެ ތަރުޖަމާނު ވިދާޅުވީ އެ ސަރަހައްދުގައި ބޮމުގެ ވަރުގަދަ ދެ ހަމަލާއެއް ދީފައިވާ ކަމަށެވެ. އެހެންކަމުން މި ހާދިސާއަށްފަހު ކާބުލްގެ އަސްކަރީ ހަސްފަތާލު ހުންނަ ސަރަހައްދުގެ ސަލާމަތީ ކަންކަން މިހާރު ވަރުގަދަ ކޮށްފައިވާ ކަމަށް އޭނާ ވިދާޅުވިއެވެ.

މި ހަމަލާގެ ޒިންމާ އަދި އެއްވެސް ޖަމާއަތަކުން ނަގާފައިނުވާއިރު، ބޮޑަށް ތުހުމަތު ކުރެވެނީ މިއީ އައިއެސްއާ ގުޅުން އޮންނަ ޖަމާއަތެއްގެ އަމަލެއް ކަމުގައެވެ. އެއީ ކުރިން ވެސް މިފަދަ ލާއިންސާނީ އަމަލުތައް އެ ޖަމާއަތުން ހިންގާފައިވާތީއެވެ.

އަފްޣާނިސްތާނުގެ ވެރިކަމާ ތާލިބާން ޖަމާއަތުން ހަވާލުވުމާއެކު އައިއެސްއާ ގުޅިފައިވާ ޖަމާއަތްތަކުން އަންނަނީ ހަނގުރާމައިގެ އެކި ހަރަކާތްތައް ހިންގަމުންނެވެ. އެގޮތުން މީގެ ކުޑަ ދުވަސްކޮޅެއް ކުރިން ކަންދަހާރުގެ މިސްކިތެއްގައިވެސް ބޮން ގޮއްވައި އެތައް ބަޔަކު މަރާލާފައިވެއެވެ.