ސަރުކާރުން މަޖިލީހަށް އިތުރު 4 ބިލެއް ފޮނުވައިފި ކަަމަށް ބަންޑާރަ ނާއިބުގެ އޮފީހުން ހާމަކޮށްފިއެވެ.

އެޓާރނީ ޖެނެރަލްގެ އޮފީހުން މިއަދު ބުނީ ސަރުކާރުގެ ފަރާތުން ރައްޔިތުންގެ މަޖިލީހަށް ހުށައެޅުމަށް ރައީސް އޮފީހަށް ފޮނުވާފައިވާ ބިލުތަކަކީ ނެތިދިޔުމުގެ ބިރުހީވެފައިވާ ދިރޭތަކެތީގެ ބައިނަލްއަޤްވާމީ ވިޔަފާރިކުރުމުގެ ބިލާއި ފެނާއި ނަރުދަމާގެ ޤާނޫނަށް އިިޞްލާޙުގެނައުމުގެ ބިލާއި ކޯޓުތަކުގެ ޤާނޫނަށް އިިޞްލާޙުގެނައުމުގެ ބިލުގެ އިތުރުން ފަނޑިޔާރުންގެ ޤާނޫނަށް އިިޞްލާޙުގެނައުމުގެ ބިލު ކަމަށެވެ.

ބަންޑާރަނާއިބުގެ އޮފީހުން އިތުރު 4 ބިލެއް މަޖިލީހަށް ފޮނުވުމަށް ނިންމަވާފައިވާއިރު މަޖިލީހުގެ 3 ވަނަ ދައުރު ފެށުމުގެ ކުރިން މިދިޔަ އޮގަސްޓްމަހު ބަންޑާރަނައިބުގެ އޮފީހުން ވަނީ މަޖިލީހުގެ ތިން ވަނަ ދައުރަށް އެކި ދާއިރާތަކުން ޖުމްލަ 32 ބިލެއް ހުށަހަޅަން ނިންމައި ބިލުތަކުގެ ލިސްޓެއް އާންމުކޮށްފައެވެ.

އޭގެ ތެރޭގައި، ގާނޫނީ އަދި ޝަރުއީ ދާއިރާއާ ގުޅުންހުރި ބިލުތަކާއި، ދީނީ އަދި އިޖްތިމާއީ ދާއިރާއާގުޅޭ ބިލުތަކާއި، އިގުތިސާދީ އަދި ތިމާވެށީގެ ދާއިރާއާގުޅޭ ބިލުތައް ހިމެނެއެވެ.

މިހާރު ކުރިއަށްދާ ތިންވަނަ ދައުރުގެ މިހާތަނަށް 34 ޖަލްސާއެއް ބާއްވާފައިވާއިރު، މި ދައުރުގައި ސަރުކާރުން މިހާތަނަށް މަޖިލީހަށް ހުށަހެޅި ހަތަރު ބިލަކީ ހެއްކާ ބެހޭ ބިލާއި ކާބޯތަކެތީގެ ރައްކާތެރިކަމުގެ ބިލާއި އިލެކްޓްރޯނިކް މުއާމަލާތުތަކާބެހޭ ބިލާއި ގާނޫނުލްއުގޫބާތަށް އިސްލާހު ގެނައުމުގެ ބިލެވެ.

މަޖިލީހުގައި މިހާރު ވެސް 33 ބިލެެއްގެ މަސައްކަތް ނުނިމިއެބައޮތް ކަމަށް މަޖިލީހުގެ ރައީސް، ރައީސް މުޙައްމަދު ނަޝީދު ވަނީ ވިދާޅުވެފައެވެ.