އަފްޣާނިސްތާނުގައި ބޭރު ފައިސާއިން ވިޔަފާރީގެ އެއްވެސް މުއާމަލާތެއް ކުރުން މަނާކޮށްފިއެވެ.

އެގޮތުން އަފްޣާން ސަރުކާރަށް މިހާރު ވެރުވެގެން ތިބި ތާލިބާނުން ވަނީ އާންމު ވިޔަފާރިތަކުގައި ބޭރު ފައިސާ ބޭނުންކުރުން މަނާކޮށްފައެވެ. އަފްޣާނިސްތާނުގެ އެތެރޭގެ ވިޔަފާރި ތަކުގައި ވެސް ޑޮލަރު ބޭނުން ކޮށްގެން މުޢާމަލާތު ކުރުމަކީ މިހާތަނަށްވެސް އާންމުކޮށް ހިނގަމުން އަންނަ ކަމެކެވެ.

އަފްޣާނިސްތާނުގެ ބާޒާރުތަކުގައި ޑޮލަރުން ވިޔަފާރި ކުރުން އެންމެ ބޮޑަށް އާންމުވެފައިވަނީ، އެ ގައުމާއި އެހެން ގައުމުތައް ގުޅޭ ސަރަހައްދު ނުވަތަ ބޯޑަރު ކައިރީގެ އަވަށްތަކުގައެވެ.

އޮގަސްޓް މަހުގެ ފަހުކޮޅު ތާލިބާނުން އަފްޣާނިސްތާނުގެ ވެރިކަމަށް ވެރިވުމާއި ގުޅިގެން، އެހެން ގައުމުތަކުގައި ހުރި އެގައުމުގެ މުދަލާއި ފައިސާ އެމެރިކާގެ މަރުކަޒީ ބޭންކާއި، ޔޫރަޕްގެ މަރުކަޒީ ބޭންކުތަކުން ވަނީ ހިފަހައްޓާފައެވެ.

އަފްޣާނިސްތާނުގައި ބޭރު ފައިސާއިން ވިޔަފާރީގެ އެއްވެސް މުއާމަލާތެއް ހިންގުން ޠާލިބާނުން މަނާކޮށްފައިވާއިރު, އެގައުމުގައި ގާއިމުކޮށްފައިވާ ޠާލިބާނުންގެ ވެރިކަން ގަބޫލުނުކުރުމުގެ ނަތީޖާ ވަރަށް ހިތިވާނެކަމަށް ޠާލިބާނުން ވަނީ ބުނެފައެވެ.

ބައިނަލްއަގުވާމީ މުޖުތަމައުން ޠާލިބާނުންގެ ވެރިކަން ބަލައިގެންފައިނުވާއިރު, ބައެއް ގައުމުތަކުގެ ވަފުދުތައް ޠާލިބާނުންނާ ބައްދަލުކޮށް މަޝްވަރާކުރި ނަމަވެސް އެ ޖަމާއަތުގެ ވެރިކަން ގަބޫލުކުރުމަށް ވަނީ ފަސްޖެހިފައެވެ.