އެމެރިކާއިން ސައުދީ އަރަބިއްޔާއަށް ގިނަ އަދަދެއްގެ ހަތިޔާރު ވިއްކަން ނިންމައިފިއެވެ.

ޕެންޓަގަނުން ނެރުނު ބަޔާނެއްގައި ބުނެފައިވަނީ އެމެރިކާގެ ރައީސް ޖޯ ބައިޑަންގެ ސަރުކާރުން 650 މިލިއަން ޑޮލަރުގެ ހަތިޔާރު ސައުދީ އަރަބިއްޔާއަށް ވިއްކުމަށް ނިންމާފައިވާ ކަމަށެވެ. އަދި މިކަމަށް ހުއްދަ ހޯދުމަށް އެދި ކޮންގްރެސްއަށް ވަރަށް އަވަހަށް ހުށަހަޅާނެ ކަމަށްވެސް މި ބަޔާނުގައި ފާހަގަކޮށްފައިވެއެވެ.

މީގެއިތުރުން ޕެންޓަގަނުން ނެރުނު ބަޔާނުގައި ބުނެފައިވަނީ ސައުދީއަށް 650 މިލިއަން ޑޮލަރުގެ ހަތިޔާރު ވިއްކަން ނިންމީ އެގައުމުގެ ދިފާއަށް އަދި މުޅި ސަރަހައްދުގައި އަމަން އަމާންކަން ގާއިމުކުރުމަށްޓަކައި ކަމަށެވެ.

އެގޮތުން މިދިޔަ ސެޕްޓެމްބަރު މަހުވެސް އެމެރިކާއިން ވަނީ ޔަމަން ހަނގުރާމައިގައި ސައުދީ ސިފައިން ބޭނުންކުރާ އަސްކަރީ ހެލިކޮޕްޓަރުތައް މަރާމާތުކުރުމަށް ބޭނުންވާ 500 މިލިޔަން އެމެރިކާ ޑޮލަރުގެ އެއްބަސްވުމެއްގައި ސޮއިކޮށްފައެވެ.

މިކަންކަމާ ގުޅޭގޮތުން މީޑިއާ ރިޕޯޓްތައް ބުނަނީ އެމެރިކާގެ މިފަދަ އަމަލުތަކަކީ ޔަމަންގެ ހަނގުރާމަ އިތުރަށް ދިގުލައި ދިއުމަށް ހިތްވަރު ދިނުމުގެ ގޮތުން ކުރާ ކަމެއް ކަމަށެވެ. އަދި މިއީ ގަލްފް ސަރަހައްދުގެ އަމަން އަމާންކަން ނަގާލުމަށް އެމެރިކާއިން ހިންގަމުން އަންނަ އަމަލުތަކެއް ކަމުގައިވެސް ރިޕޯޓްތަކުން ބުނެއެވެ.