ޖިންސީގޯނާގެ މައްސަލައެއް ސިއްރުކުރުމުން ޓްރީޓޮޕްގެ އިސްވެރިންތަކަކަށް ދަޢުވާކޮށްފިއެވެ.

ޕީޖީ އޮފީހުން ބުނެފައިވަނީ 22 ޑިސެންބަރު 2020 ވަނަ ދުވަހު، ޓްރީޓޮޕް ހޮސްޕިޓަލްގެ ނަރުހެއްގެ ގޮތުގައި މަސައްކަތްކުރަމުން ދިޔަ ފިލިޕީންސްގެ ރައްޔިތެއްކަމަށްވާ ރޮމަރ ސިމޯރާ ލަޒާޑޯ، އިތުބާރުކުރެވޭ މަޤާމެއްގައި ހުރެ ކުޑަކުއްޖަކާމެދު ޖިންސީ އަމަލު ހިންގިކަން، އެނގިހުރެ، އެ މަޢުލޫމާތު ފުލުހުންނަށް ރިޕޯޓުކޮށްފައިނުވާތީ އެ ހޮސްޕިޓަލްގެ އިސްވެރިންތަކަކަށް ދަޢުވާކޮށްފައިވާ ކަމަށެވެ.

މި މައްސަލާގައި ދައުވާކޮށްފައިވަނީ ޓްރީޓޮޕް ހޮސްޕިޓަލްގެ "ސްޕެޝަލް ކޮމިޓީ އޮން ވާރކްޕްލޭސް ބުލީއިން އެންޑް ހެރަސްމެންޓް" ގެ މެންބަރުން ކަމަށްވާ ބ. އޭދަފުށި، ފެންއާރު، އާދިލް މޫސާއާއި، ތ. ގުރައިދޫ، ކޮވެލިގެ، އާމިނަތު ސުހާގެ އިތުރުން ސ. ހުޅުދޫ، ޑޭޒީވިލާ، ނަޛީރާ ނަޖީބުގެ މައްޗަށެވެ. އެ މައްސަލަ އެ ހޮސްޕިޓަލުން ފުލުހުންނަށް އަންގާފައިވަނީ ތުހުމަތުވާ ނަރުސް މީހާ ރާއްޖެއިން ފުރި ފަހުންނެވެ.

މި ތިން މީހުންގެ މައްޗަށް ދައުވާ ކުރަނީ ކުޑަކުދިންނަށް ޖިންސީ ގޯނާކުރާ މީހުންނާމެދު ހާއްސަ އުސޫލުތަކަކަށް އަމަލުކުރުމުގެ ގާނޫނުގެ 53 ވަނަ މާއްދާގެ (ހ) އާ ހަވާލާދީ އެ މާއްދާގެ (ށ) ގެ ދަށުން، އެނގިހުރެ ނޭންގުމުގެ ކުށުގެ ދައުވާއެވެ.